5,814 total reads
Naniniwala si Jesuit Communications executive director Rev. Fr. Emmanuel Alfonso, SJ na sinasalamin ng napiling pangalan ng Santo Papa ang kanyang magiging paraan ng pagpapastol sa Simbahang Katolika.
Ayon sa Pari, batay sa karanasan ng paglilingkod ni Cardinal Robert F. Prevost, O.S.A. sa mga indigenous peoples, mga tribal minorities at maliliit na komunidad sa Peru ay makikita ang puso para sa mahihirap ng bagong Santo Papa na pinili ang pangalang Pope Leo XIV.
“Nung narinig ko na ito yung kinuhang pangalan ng bagong Santo Papa, Pope Leo XIV… matagal siyang nagtrabaho sa Peru naging Obispo siya sa Peru at nagtrabaho sa mga IPs doon, sa mga indigenous peoples, mga tribal minorities. So malinaw po, ang puso niya ay para sa mga mahihirap kaya yun ang pinili niyang pangalan -Pope Leo XIV.” Bahagi ng pahayag ni Fr. Alfonso.
Sa kasaysayan ay pinipili ng mga bagong punong pastol ang pangalan ng mga nakalipas na Santo Papa bilang paggalang, paghanga o pagkilala sa kanilang paglilingkod sa kawan ng Panginoon, o bilang batayan kung paano nila hangad isulong ang mga reporma o paraan ng paglilingkod sa Simbahang Katolika.
Pagbabahagi ni Fr. Alfonso, ang sinundan ni Pope Leo XIV na si Pope Leo XIII ang nagpasimula ng Catholic Social Teaching, na dahilan sa pagkakaroon ng mga labor union sapagkat nung panahon ng industrial revolution ay maraming mga kababaihan at bata ang nagtatrabaho at naabuso sa iba’t ibang mga pabrika, na nakita ng Simbahan at dahilan upang isinulat ni Pope Leo XIII ang ‘Rerum Novarum’ na sa Pilipino ay ‘Mga Bagong Bagay’, ‘New Things’.
Paliwanag ng Pari, nagsimula rin kay Pope Leo XIII ang tradisyon ng Simbahan na paninindigan sa iba’t ibang mga usaping panlipunan lalong lalo na para sa kapakanan ng mga mahihirap.
“Very Significant po yun, hindi yun aksidente like halimbawa yung pinakasinundan niya si Pope Leo XIII yan yung tinuturo namin na nagsimula ng Catholic Social Teaching tradition. Si Pope Leo XIII, siya po ang dahilan kung bakit may mga labor union dahil po nung panahon ng industrial revolution, marami po ang mga kababaihan at bata noon nasa mga factory na nagtatrabaho ng one-to-sawa at nakita po yan ng Simbahan at nakialam si Pope Leo XIII kaya isinulat niya yung ‘Rerum Novarum’ which means in
Tagalog ‘Mga Bagong Bagay’ – ‘New Things’ – ‘Rerum Novarum’. So nagsimula dito sa kaya ang tradisyon ng Simbahan na naninindigan sa mga issue ng lipunan lalong lalo na sa kapakanan ng mga mahihirap yan po si Pope Leo XIII.” Dagdag pa ni Fr. Alfonso.
Matapos ang tradisyonal na pag-aanunsyo sa Latin ng “Habemus Papam” na nangangahulugang ‘may Santo Papa na tayo’, ay lumabas sa balkonahe ng St. Peter’s Basilica si Cardinal Robert F. Prevost, O.S.A. na napiling gamitin ang Papal Name na ‘Pope Leo XIV’.
Sa tala sa kasaysayan, ang pangalang ‘John’ ang may pinaka-maraming beses na nagamit na umabot sa 23-pagkakataon na sinundan naman ng ‘Gregory’ at ‘Benedict’ na umabot sa 16-na pagkakataon, habang ang ‘Pius’ naman ay umabot ng pitong pagkakataong nagamit na pangalan ng isang Santo Papa.
