21,298 total reads
Nilagdaan na ni Pangulong Ferdinand Marcos Jr. ang batas na nagpapaliban sa Barangay at Sangguniang Kabataan Elections o BSKE at nagtatakda ng limang taong termino para sa mga opisyal ng barangay at SK.
Sa ilalim ng Republic Act No. 12326, ililipat sa Nobyembre 2028 ang susunod na regular na halalan sa barangay at Sangguniang Kabataan, mula sa nakatakdang botohan ngayong Nobyembre 2, 2026.
“Sa paglagda natin sa 𝗥𝗲𝗽𝘂𝗯𝗹𝗶𝗰 𝗔𝗰𝘁 𝗡𝗼. 𝟭𝟮𝟯𝟮𝟲, na nagtatakda ng limang taong termino para sa mga opisyal ng barangay at Sangguniang Kabataan, malinaw ang ating inaasahan sa ating mga kasalukuyang opisyal. Gamitin ang panahong ito upang mas pagbutihin ang serbisyo, tapusin ang mga nasimulang programa at mas tutukan ang pangangailangan ng bawat komunidad, pamilya at kabataan,” ayon sa pahayag ng Pangulo.
Dahil dito, madaragdagan ng isang taon ang kasalukuyang apat na taong termino ng mga opisyal ng barangay at SK.
Ayon sa Pangulo, dapat gamitin ng mga kasalukuyang opisyal ang karagdagang panahon upang mapabuti ang serbisyo, tapusin ang mga nasimulang programa at higit na tutukan ang pangangailangan ng kanilang mga komunidad at kabataan.
Dagdag pa ng Pangulo, “Hindi ito dagdag na panahon sa puwesto. Dagdag itong panahon ng pananagutan sa taumbayan.”
Sa batas, hindi rin maaaring lumampas sa dalawang magkasunod na termino sa parehong posisyon ang mga halal na opisyal ng barangay, habang isang termino lamang sa parehong posisyon ang itinakda para sa mga opisyal ng Sangguniang Kabataan.
