37,786 total views
Itinuturing ni San Carlos Bishop Gerardo Alminaza bilang payong kapatid ang mensaheng ipinaabot ni dating SMNI TV host Jeffrey ‘Ka Eric’ Celiz, na pagtuunan ng pansin ang pananalangin para sa bayan.
Ito ang tugon ni Bishop Alminaza-vice chairman ng Catholic Bishops’ Conference of the Philippines – Episcopal Commission on Social Action Justice and Peace kaugnay sa pahayag ni Celiz na nag-uudyok sa Obispo na tigilan ang pagsasalita sa mga usapin sa politika kasabay ng muling paratang ng pangangalaga sa mga komunista sa bansa.
Sa pamamagitan ng kanyang Facebook post, isinantabi ni Bishop Alminaza ang kritisismo ni Celiz sa halip ay tiniyak ng Obispo ang patuloy na pananalangin at pagsusulong ng tunay na kapayapaan na hinahangad rin ng Panginoon para sa sangkatauhan.
Bukod sa pananalangin para sa kapakanan ng mamamayan, bingiyan tuon din ni Bishop Alminaza ang pananalangin ng kaluluwa ng lahat ng mga namayapa, maging ang panalangin para kay kay Celiz.
“Thank you, Ka Eric, for your fraternal exhortation. Rest assured I will continue to kneel, pray and advocate for genuine and integral peace based on justice – the peace promised by our Risen Lord – for you and your loved ones, for all the souls of our beloved dead, and for all those who need most our prayers. If I may ask for your prayers, too!” Bahagi ng pahayag ni Bishop Alminaza.
Ipanalangin ng Obispo ang kalagayan ng mga nangangailangan sa lipunan lalo na ang mga nagdurusa gaya ng mga biktima ng karahasan, ang mga naisasantabi sa lipunan at mga biktima ng paniniil at pag-uusig.
“We choose to whom and with whom we respond as a neighbor – with everyone of course! But especially, preferentially with those who suffer: the victims, those who are oppressed, deprived and persecuted,” ayon pa sa obispo.
Una ng binigyang diin ni Bishop Alminaza ang kanyang paninindigan sa patuloy na pagsusulong ng katarungang panlipunan at pagsisilbing tinig ng mga naisasantabing sektor sa bansa sa kabila ng red-tagging na kanyang dinanas sa isang programa ng SMNI, sapagkat bahagi ito ng misyong iniatang ng Panginoon sa mga lingkod ng Simbahan.
