39,587 total reads
Ipinaliwanag ni dating Sandiganbayan Presiding Justice Amparo Cabotaje-Tang na kailangang maipaliwanag ng isang public official ang yaman na malaki ang diperensya kumpara sa kanyang suweldo at iba pang legal na pinagkukunan ng kita.
Sa kanyang testimonya sa Senate Impeachment Court, ipinaliwanag ni Cabotaje-Tang ang mga pamantayan sa wealth, business interests at Statement of Assets Liabilities and Networth (SALN), bilang bahagi ng Article II ng impeachment case laban kay Vice President Sara Duterte.
Ayon sa dating mahistrado, sa ilalim ng Republic Act 1379, maaaring magkaroon ng prima facie presumption na ilegal ang pagkakakuha ng ari-arian kung ito ay malinaw na hindi tugma sa suweldo at legal na kita ng isang opisyal.
Gayunman, maaari pa rin niyang pabulaanan ang ‘presumption’ sa pamamagitan ng mga dokumento at sapat na paliwanag na nagpapatunay na legal ang pinagmulan ng kanyang yaman.
Ipinaliwanag din ni Cabotaje-Tang na hindi maaaring iwasan ng isang nakaupong Pangulo o Bise Presidente ang constitutional restrictions sa negosyo sa pamamagitan lamang ng paggamit ng pangalan ng ibang tao kung siya pa rin ang tunay na nakikinabang.
“Ang beneficial owner ay yung tunay na taong nagmamay-ari ng ari-arian o ng interest sa corporation, although based on legal documents, ibang tao ang nakapangalan doon,” ayon kay Cabotaje-Tang sa pagtatanong ni Prosecution Representative Manuel Diokno.
Kabilang dito ang konsepto ng beneficial ownership, kung saan ibang pangalan ang nakalagay sa dokumento pero ibang tao ang tunay na may-ari o nakikinabang.
Tinalakay rin ang conflict of interest, o sitwasyong sumasalungat ang pribadong interes ng isang opisyal sa interes ng pamahalaang kanyang pinaglilingkuran.
Sa usapin naman ng SALN, sinabi ni Cabotaje-Tang na kailangang ideklara rito nang tama ang assets, liabilities, net worth at mga financial at business interests ng isang opisyal.
Ayon pa kay Cabotaje-Tang, “Ito ay nire-require hindi lang ng Constitution at iba pa nating umiiral na batas para malaman kung ang isang official ba ay yumaman habang siya ay nasa puwesto at kung paano niya na-acquire itong yaman na ito.”
Ang SALN ay mahalaga upang masuri kung nagkaroon ng malaking pagbabago sa yaman ng isang opisyal habang nasa puwesto at kung paano ito nakuha.
binanggit pa ng dating mahistrado na mas mahigptit na pinapairal ng batas sa Presidente at Bise Presidente, bilang pinakamatataas at pinakamaimpluwensyang opisyal ng bansa.
Samantala, kabilang sa Article II ang alegasyon na nagkaroon si Duterte ng yaman na hindi tugma sa kanyang legal na kita, hindi tama o kulang ang ilang SALN, at nagpatuloy sa ipinagbabawal na business interests.
