5,735 total reads
Inilunsad ng Living Laudato Si’ Philippines ang Arbores Gratiarum o Trees of Thanksgiving, kasabay ng pagdiriwang ng Kapistahan ng Pagtatampok ng Krus na Banal.
Ito ay isang pitong-taong programa na naglalayong palawakin ang kultura ng pagpapaigting ng pangangalaga sa mga puno at kagubatan.
Ayon kay Rodne Galicha, executive director ng Living Laudato Si’ Philippines, layunin ng kampanya na tiyaking hindi matatapos sa pagtatanim lamang ang pangangalaga sa kalikasan, kundi masusubaybayan ang paglago at kaligtasan ng mga punong itinanim.
“In the face of this continuing loss, we want to help build a culture not only of planting, but of growing, sustaining, protecting and restoring,” ayon kay Galicha.
Sa ilalim ng programa, hinihikayat ang bawat kalahok na mag-alaga ng pitong puno bawat taon sa loob ng pitong taon, o kabuuang 49 na puno hanggang 2033.
Naniniwala si Galicha na kung magtutulungan ang mahigit isang bilyong Katoliko sa mundo ay mapapanauli ang kalagayan ng kalikasan na lubhang napinsala dahil sa kapabayaan at mapang-abusong gawain ng tao.
Binigyang-diin ni Galicha na higit pa sa dami ng mga punong maitatanim ang nais masukat ng programa, kabilang ang kanilang kakayahang mabuhay, lumago at maging bahagi ng mga kagubatan at ecosystem.
“But this is not simply about planting or counting trees. We want to journey with them — to know how many take root, survive, grow, and become part of living forests and ecosystems,” aniya.
Ang paglulunsad ng programa ay bahagi rin ng pagdiriwang ng Season of Creation na sinimulan noong September 1 hanggang sa ikalawang Linggo ng Oktubre.
Iniuugnay rin ng Living Laudato Si’ Philippines ang inisyatiba sa pananampalataya sa pamamagitan ng panawagang “From the wood of the Cross to living trees of thanksgiving.”
Hinihikayat ng grupo ang mga pamilya, parokya, paaralan, komunidad, organisasyon, at institusyon na makibahagi sa pitong-taong paglalakbay ng pagtatanim, pagpapalaki, at pangangalaga ng mga puno hanggang 2033.
