4,012 total reads
Muling nanindigan si Bayombong Bishop Jose Elmer Mangalinao laban sa mining exploration ng Northern Luzon Mineral Resources sa bayan ng Kasibu, Nueva Vizcaya kasunod ng pagtatayo ng dalawang bagong barikada ng mga residente noong ika-10 ng Mayo.
Sa inilabas na opisyal na pahayag, sinabi ni Bishop Mangalinao na ang pagmimina sa lugar ay sumasaklaw sa mahigit 4,400 ektarya na kinabibilangan ng mga barangay ng Pao, Kakiduguen, at iba pang karatig na komunidad.
Binigyang-diin ng obispo ang patuloy na pakikiisa ng Simbahan sa mga residenteng tumututol sa mga gawaing pagmimina na maaaring magdulot ng pinsala sa kabundukan, mga watershed, kabuhayan, at kaligtasan ng mga pamayanang umaasa sa likas-yaman ng lalawigan.
“Muli po tayong tumitindig at naninindigan! Ang pagmimina ay lubhang nakasisira sa kabundukan, kapaligiran, kalikasan, kabuhayan, at buhay,” pahayag ni Bishop Mangalinao.
Hinimok din ni Bishop Mangalinao ang publiko na suportahan ang mga pamayanang matapang nagsusulong ng pangangalaga sa kalikasan at nagtatanggol sa kinabukasan ng susunod na henerasyon.
Iginiit ng obispo na ang pagtatanggol sa kalikasan ay hindi lamang usaping pangkabuhayan kundi pananagutang moral at espiritwal ng bawat mananampalataya.
“Bilang tanda ng ating pagiging maka-Diyos, makatao, makabayan, at makakalikasan, mangyari po na ating muling suportahan ang mga mamamayan na matapang na nagtatanggol sa ating kalikasan at kinabukasan,” ayon sa obispo.
Ibinahagi rin ni Bishop Mangalinao ang nakasaad sa Aklat ng Genesis, na tungkulin ng tao na pangalagaan at ingatan ang nag-iisang tahanan bilang biyaya ng Diyos.
“Muli tayong magsama sama sa pagtutol sa pagsira ng ating kalikasan, kabuhayan, at buhay! No to destructive mining! Defend Nueva Vizcaya! Defend our Watersheds! Defend our life and livelihood,” saad ni Bishop Mangalinao.
