37,782 total views
Inilarawan ni Adamson University President, Vincentian Fr. Danilo Franklin Pilario, na isang makabagong anyo ng “people power” ang paglulunsad ng digital platform na maglalayong tutukan at bantayan ang mga anomalya sa pamahalaan.
Ito ang Bisto Proyekto na inilunsad sa Adamson University nitong February 21, 2026, na pinagsama-samang inisyatiba ng iba’t ibang sektor sa pangunguna ng Taongbayan Action for Participatory, Accountable and Transparent Governance (TAPAT) at BetterGov.ph, katuwang ang Department of Public Works and Highways (DPWH), Catholic Bishops’ Conference of the Philippines (CBCP), at Mayors for Good Governance (M4GG).
Ayon kay Fr. Pilario, hindi lamang mga eksperto o opisyal ang maaaring makilahok sa pagbabantay kundi maging ang mga karaniwang mamamayan na direktang naaapektuhan ng mga palpak o kuwestiyonableng proyekto ng pamahalaan.
“Kung meron man kayong [mapag-alamang] mga katiwalian, lalong-lalo na sa flood control projects and DPWH projects, pwede na po natin gamitin ang Bisto Proyekto. At kahit sino—estudyante, ordinaryong mamamayan, nanay— pwede ninyong i-monitor ang mga projects na meron sa inyong kapaligiran,” pahayag ni Fr. Pilario sa panayam ng Radyo Veritas.
Maaaring ma-access ang platform sa pamamagitan ng website na bisto.ph kung saan makikita ang detalye ng mga proyekto at maaaring magsumite ng ulat sakaling may mapansing iregularidad.
Sinabi pa ni Fr. Pilario na sa ganitong paraan ay napalalakas ang pakikilahok ng taumbayan sa pagsusulong ng transparency at pananagutan ng pamahalaan.
Ang paglulunsad ng nasabing online platform ay bahagi rin ng paggunita sa ika-40 ng anibersaryo ng EDSA People Power Revolution na naganap noong Pebrero 1986.
“Sa pamamagitan nito, mabubuhay natin ang people power dahil ang people power ay hindi lang nangyari noong 1986. Dapat magpapatuloy sa araw-araw nating pamumuhay. Kaya tuloy ang people power, mabuhay ang Bisto Proyekto,” saad ni Fr. Pilario
