10,966 total views
Gugunitain ng Archdiocese of Manila ang ika-20 anibersaryo ng kamatayan ni dating Manila Archbishop Jaime Cardinal Sin sa June 21.
Magkaroon ng pagdiriwang ng banal na misa sa alas 7:30 ng umaga sa Minor Basilica and Metropolitan Cathedral of the Immaculate Conception o Manila Cathedral na pangungunahan ni Cardinal Jose Advincula.
Inaanyayahan ang mamamayan na makiisa sa pagdiriwang at pag-aalala sa yumaong cardinal na tanyag sa kanyang adbokasiyang paninindigan para sa kalayaan ng mga Pilipino mula sa umiiral na Batas Militar.
Kasunod ng banal na misa ay babasbasan ni Cardinal Advincula ang libingan ng namayapang arsobispo sa crypt ng Manila Cathedral.
Si Cardinal Sin ay isa sa pangunahing personalidad sa 1986 EDSA People Power Revolution na tinaguriang ‘bloodless revolution’ sa buong mundo dahilan upang mawakasan ang dalawang dekadang pamumuno ni noo’y Pangulong Ferdinand Marcos Sr.
Sa kasaysayan nanawagan si Cardinal Sin sa mga Pilipino sa pamamagitan ng Radio Veritas kung saan hinimok itong magtungo sa EDSA upang suportahan ang mga grupong umaaklas sa rehimeng Marcos dahilan upang magtipon ang mamamayan at matagumpay na nasupil ang diktaduryang pamahalaan.
Ang namayapang cardinal ay nanilbihan sa arkidiyosesis nang halos tatlong dekada makaraang maitalagang arsobispo noong 1974 hanggang magretiro noong 2003 habang pumanaw naman noong June 21, 2005 dahil sa karamdaman.
