16,264 total reads
Pinag-iingat ng Diocese of Cabanatuan ang publiko sa nagpapakilalang pari ng simbahang katolika na nagngangalang Ed Jerios na nagdiriwang ng mga banal na misa at sakramento sa ilang lugar na sakop ng diyosesis.
Batay sa mga ulat na nakarating sa tanggapan ni Cabanatuan Bishop Prudencio Andaya Jr., nagpakilala si Jerios bilang pari ng Diocese of Iligan.
Ngunit sa pakikipag-ugnayan sa Diocese of Iligan napag-alamang walang pari ang diyosesis sa naturang pangalan maging sa pinakabagong Catholic Directory of the Philippines.
“In lights of these, we wish to clarify that Mr. Ed Jerios is neither an ordained Catholic priest of the Diocese of Iligan nor a member of any diocese or religious congregation here in the Philippines,” bahagi ng pahayag ni Cabanatuan Chancellor Fr. Sedfrey Calderon.
Dahil dito lahat ng mga liturgical celebrations at maging ang mga iginawad ng sakramento ni Jerios ay walang bisa at hindi pinahihintulutan.
Iginiit din ng diyosesis na ang mga banal na misa ay pinahihintulutan lamang sa mga parokya at barangay chapels at patuloy na pinag-iingat ang mamamayan sa pakikipag-ugnayan kay Jerios.
Paalala rin nito sa publiko na ugaliing beripikahin ang pagkakilanlan ng mga iimbitahing pari na magdiriwang ng banal na misa o mga sakramento upang matiyak na ito ay lehetimong pari ng Roman Catholic Church.
“Please be reminded that it is a standing policy of the diocese that a valid celebret must always be produced by any individual claiming to be a Catholic priest prior, to being allowed to celebrate the Holy Mass or preside any liturgical celebration within the diocese,” ani Fr. Calderon.
Ang celebret ay opisyal na dokumentong ibinibigay ng obispo sa mga pari na nagpapatunay na may pahintulot itong magsagawa ng mga pagdiriwang at sakramento lalo na sa labas ng ecclesiastical jurisdiction.
