25,702 total views
Nabahala ang opisyal ng Catholic Bishops’ Conference of the Philippines-Episcopal Commission on Indigenous Peoples (CBCP-ECIP), kaugnay sa epekto ng mga mapaminsalang proyektong isinasagawa sa mga lupain ng mga katutubo na walang sapat na konsultasyon at tunay na Free, Prior and Informed Consent (FPIC).
Ito ang naging pahayag ni CBCP-ECIP executive secretary Tony Abuso sa panayam sa Padáyon: The Filipino Synodal Witnessing of the Catholic Faith, na bahagi ng ikatlo at huling araw ng 11th Philippine Conference on New Evangelization sa University of Santo Tomas noong July 20, 2025.
Patungkol ito sa kasalukuyang kalagayan ng mga katutubo sa Sitio Marihangin sa Bugsuk Island, Balabac, Palawan na nanganganib ang kaligtasan dahil sa banta ng sapilitang pagpapaalis at panggigipit mula sa mga tauhan ng San Miguel Corporation.
“Marami pong ganitong sitwasyon, iba lang po siguro ang porma, pero iyon pa rin – ‘yung pagpasok ng mga programang pang-kaunlaran na hindi nako-konsulta ang mga katutubo,” ayon kay Abuso.
Binanggit ni Abuso na ang usapin ay hindi lamang limitado sa isang korporasyon na nagsasagawa ng mga sinasabing development projects ng pamahalaan na sinasabing may pahintulot ngunit walang tunay na FPIC mula sa mga katutubo.
Aminado ang opisyal na may pagkukulang din ang Simbahan sa ganitong usapin, ngunit patuloy naman ang pagkilos at pakikiisa nito sa mga katutubo.
Pinuna rin ni Abuso ang kawalan ng pagkilala at pakikiisa ng maraming Katolikong Kristiyano sa mga katutubo, gayundin ang pananahimik ng ilang lider ng pamahalaan na Kristiyano rin.
“Mismong marami pa rin sa ating mga Kristiyanong Katoliko ang hindi nakikilala, hindi nakikiisa sa mga kapatid nating katutubo… Pero ‘yung mga namumuno sa ating pamahalaan na kasama sa ating pananampalataya ay sila pa rin ang nangunguna para mapanatili pa ring nasa laylayan ang mga kapatid nating katutubo. Sila ‘yung mga hindi nagpapatupad ng batas,” ayon kay Abuso.
Matatandaang nagpahayag ng pakikiisa sa mga katutubo ng Sitio Marihangin sina Puerto Princesa Bishop Socrates Mesiona at Taytay Bishop Broderick Pabillo para sa pangangalaga sa karapatan ng mga katutubo.
Sa Laudato Si’, binigyang-diin ng yumaong Santo Papa ang kanyang pag-aalala sa kalagayan ng mga katutubo, na madalas dumanas ng pananakot, pang-uusig, at sapilitang pagpapalayas sa kanilang mga lupaing ninuno para bigyang-daan ang mapaminsalang pag-unlad.
Iginiit ni Pope Francis na ang mga katutubo ay likas na tagapangalaga ng kalikasan at itinuturing na mga tunay na katiwala ng sangnilikha.
