10,030 total reads
Hinimok ni Cebu Archbishop Alberto Uy ang mga lider ng lalawigan ng Cebu na maglingkod ng buong katapatan para sa kabutihan ng nakararami.
Sa ginanap na civic reception ng Cebu Provincial Government sa pangunguna ni Governor Pamela Baricuatro, sinabi ng arsobispo na bilang mga lider ng lipunan, dapat tiyakin maging mabuting katiwala sa pamayanang kanilang pinaglilingkuran.
“We must earn the trust of our people, prove ourselves through service, and ensure that leadership is never about power, but about the common good,” ayon sa pahayag ni Archbishop Uy.
Kinilala ng arsobispo ang bagong pamunuan sa lokal na pamahalaan ng Cebu, kabilang ang bagong gobernador, bise gobernador, at alkalde ng Cebu City. Ayon sa kanya, ang kanyang pag-upo bilang bagong arsobispo ng arkidiyosesis ay nangangahulugang bagong simula sa larangan ng paglilingkod sa pamayanan.
“Let us journey together, church and government, leaders and people, hand in hand, so that this moment of four new beginnings will not be wasted, but will bear fruit for generations to come,” ani ng arsobispo.
Bilang hamon sa pamunuan ng lalawigan at lunsod, hinikayat ni Archbishop Uy na paigtingin ang pangangalaga sa kalikasan, gaya ng pagtatayo ng Laudate Deum Tree Parks upang labanan ang lumalalang climate change at bilang pagparangal kay Pope Francis, na nagpamalas ng labis na pagmamahal sa sangnilikha.
Sa gitna ng matinding usapin ng katiwalian sa bansa, nangako si Archbishop Uy sa mamamayan at mga lider ng pamahalaan na magiging katuwang ang arkidiyosesis sa pagtutol sa mga ghost projects na naglulustay ng pera ng bayan sa halip ay iminungkahing isulong ang mga ‘godly projects.’
“No to ghost projects, but yes to godly projects. Let us dedicate ourselves to projects that honor God, uplift the poor, protect creation, and bring genuine progress and build lasting peace,” saad ng arsobispo.
Iginiit ng arsobispo na bukod sa paghanga ng mga nasasakupan sa mga proyektong ipatutupad, dapat din itong kalulugdan ng Diyos.
Bukod sa mga opisyal ng lalawigan, dumalo rin sa pagtitipon ang ilang mga obispo na dumating sa Cebu upang makiisa sa installation ni Archbishop Uy bilang ikalimang arsobispo ng arkidiyosesis.
