26,267 total reads
Ipagdiriwang ng Surrender to God (SuGoD) program ang ika-9 na anibersaryo nito sa darating na Agosto 14 sa pamamagitan ng isang misa ng pasasalamat at pormal na pagbubukas ng bagong ayos na Dangpanan Alang sa Paglaum (DAP) Center sa Canamucan, Compostela, Cebu.
Ayon kay Layko Cebu Chairperson at SuGoD Founder Fe Barino, lalong paiigtingin ng programa ang faith-based rehabilitation sa pamamagitan ng pinalawak na mga formation program, bilang pakikiisa sa mithiin ng pamahalaan na tuluyang alisin ang ilegal na droga sa lipunan.
“Drug addiction remains a problem in our society, and SuGoD’s faith-based recovery program has been our response since 2016—during the time of the war on drugs under PRRD—until today, now with better programs and facilities,” ani Barino.
Ang DAP Center ay magsisilbing ligtas na lugar para sa mga kalahok sa programang SuGoD na dumaraan sa proseso ng rehabilitasyon. Isa ito sa mga inisyatibo ng Duros Group upang tugunan ang pangangailangan ng pamayanan sa pamamagitan ng pagpapalakas ng pananampalataya at pagpapahayag ng mensahe ni Kristo.
Itinatag noong 2016 kasabay ng paglulunsad ng malawakang kampanya laban sa ilegal na droga, nakatulong na ang SuGoD program sa daan-daang indibidwal upang matapos ang kanilang rehabilitasyon. Bukod sa spiritual formation, tinuturuan din ang mga kalahok ng iba’t ibang kasanayan—lalo na sa larangan ng konstruksyon—bilang paghahanda sa kanilang pagbabalik sa lipunan.
Sa pagpasok ng ikasampung taon nito, tiniyak ni Barino na magpapatuloy ang SuGoD sa pagtulong sa mga taong nagnanais magbago, “not only to help them overcome addiction but also to rebuild their lives with faith, dignity, and purpose.”
