560 total views
Tiniyak ng Teachers Dignity Coalition (TDC) ang patuloy na pakikiisa sa Department of Education (DepEd) sa mga inisyatibo ng paghahanda para sa school year 2022-2023 na magsisimula sa August 22.
Ayon kay Benjo Basas, chairperson ng TDC suportado nila ang Brigada Eskwela na isinasagawa sa halos lahat ng pampublikong paaralan sa kasalukuyan at Oplan Balik Eskwela (OBE)na ngayong araw ng August 15 nagsimula.
“Nakikiisa kami sa DepEd sa layunin nitong maisaayos ang mga paaralan sa pagbubukas ng klase. Kaya naman suportado namin ang Brigada Eskwela at maging itong Oplan Balik Eskwela,” ayon sa mensaheng ipinadala ni Basas sa Radio Veritas.
Ipinaliwanag ni Basas na kahanay ang mga inisyatibo sa mga panawagan ng TDC na pahabain ang bakasyon bago magsimula ang susunod na taon ng pag-aaral hanggang September 12.
Ito ay upang magkaroon ng sapat na panahon ang mga guro upang higit na paghandaan ang nalalapit na pagbubukas ng mga paaralan na paiiralin ang hybrid learning systems ng Limited Face to Face Classes, Online classes at modular learning.
Pagsapit ng Nobyembre, sa bisa ng DepEd Department Order No.34 ay ipapatupad ang 100%-kapasidad sa lahat ng pribado at pampublikong paaralan.
Ang Brigada Eskwela ay inisyatibo ng kagawaran kung saan isinasagawa ang pagkukumpuni o pagsasaayos ng mga pasilidad habang ang OBE naman ay ang hakbang kung saan tinutulungan ng mga kawani ng DepEd ang mga mag-aaral at kanilang mga magulang/legal Guardians upang matiyak na magiging maayos ang proseso ng enrollment period.
Sa pagsisimula ng bagong taon ng pag-aaral, inaasahan ng Catholic Educational Association of the Philippines (CEAP) na matutugunan ng buong bansa ang pag-usbong ng ‘Learning Poverty’ na naranasan higit na ngayong panahon ng pandemya.
