226 total views
Inaanyayahan ng Diocesan Shrine and Parish of San Isidro Labrador ang mga mananampalataya na makibahagi sa gaganaping Grand Isidorian Procession 2026 bilang bahagi ng patuloy na pagpapalaganap ng debosyon sa patron ng mga magsasaka.
Sa pahayag ng dambana at parokya, pangungunahan nila ang taunang pagdiriwang sa March 12, 2026 kasabay ng paggunita sa ika-404 na anibersaryo ng kanonisasyon ni San Isidro Labrador.
“Sa patuloy na pagpapalaganap ng debosyon sa ating patron na si San Isidro Labrador, at sa pagdiriwang ng ika-404 na Anibersaryo ng kanyang Kanonisasyon, pangungunahan ng ating
Dambana at Parokya, kasama ang Hermano Mayor na si G. Hans Franco De Jesus Cruz, ang Grand Isidorian Procession 2026 sa ika-12 ng Marso 2026,” ayon sa pahayag.
Inaasahang makikiisa sa maringal na prusisyon ang mga imahen ni San Isidro Labrador mula sa iba’t ibang dambana, parokya, at pamayanan sa iba’t ibang bahagi ng Luzon.
“Lalahukan ito ng mga imahen ni San Isidro Labrador mula sa kanyang mga dambana, parokya, at pamayanan sa iba’t ibang bahagi ng Luzon,” dagdag pa ng pahayag.
Bago ang prusisyon ay magkakaroon ng banal na misa sa ganap na alas-tres ng hapon na pangungunahan ng Rektor at Kura Paroko na si Monsignor Dars Cabral, P.C., na susundan ng maringal na prusisyon bilang parangal sa santo.
Bahagi rin ng paghahanda sa pagdiriwang ang triduo sa karangalan ni San Isidro Labrador mula March 9 hanggang 11.
Si San Isidro Labrador ay isang simpleng magsasaka mula sa Madrid, Spain noong ika-12 siglo na nakilala sa kanyang matinding pananampalataya, kababaang-loob, at malasakit sa kapwa lalo na sa mga mahihirap.
Si San Isidro ay ganap na naging banal noong 1622 sa ritong pinangunahan ni Pope Gregory XV kasama ng iba pang kilalang santo ng Simbahan na sina San Ignacio ng Loyola, Francisco Javier, Teresa ng Avila, at Felipe Neri.
Hanggang sa kasalukuyan ay patuloy ang debosyon sa kanya sa iba’t ibang bahagi ng mundo, lalo na sa mga pamayanang agrikultural.
Hinihikayat naman ng dambana ang mga deboto na makiisa sa mga gawain bilang pagpapakita ng pananampalataya at pasasalamat sa mga biyayang tinatanggap mula sa Diyos sa tulong ng panalangin at pamamagitan ni San Isidro Labrador.
