581 total reads
Nanawagan si Caritas Manila executive director Fr.Anton CT Pascual ng sama-samang pagdarasal upang mamamayani ng kapayapaan sa pusot ng bawat isa upang maiwasan ang paglala ng kahirapan.
Ang kahilingan ay ginawa ni Fr.Pascual sa gitna ng digmaan sa pagitan ng Amerika at Iran na nakakaapekto sa buong middle east.
“Tayo po ay nananalangin sa Panginoon sa ngalan po ng ating Our Lady of Veritas, ito sa Veritas 846, na ang kapayapaan ay maghari sa puso ng lahat ng tao sa mundo, lalo lalo na ang mga nagpapasya at mga namumuno sa bawat bansa. Naniniwala po tayo na ang digmaan ay walang mararating na kagandahan. Sabi nga sa Ingles, in every war, there are no victors, all are victims.”panalangin ni Fr.Pascual.
Inihayag ng Pari na naninindigan ang simbahang katolika na hindi sagot ang digmaan sa mga hindi pagkakaintindihan dahil nagdudulot lamang ito ng kahirapan, pagkamatay at pagkasira nang buhay ng mga inosenteng mamamayan
Ipinagdarasal ni Fr.Pascual ang paggabay ng Panginoong sa puso ng bawat isa ngayon, higit na nararanasan ang mga sigalot sa ibat-ibang panig ng daigdig.
“Mahalin natin ang ating kaaway, makipagkasundo tayo at mag-usap ng mapayapang paraan. Sapagat si Kristo, ang prinsipe ng kapayapaan, ay nagkatamang tao, nakipamuhay sa atin, namatay, nagpakasakit at muling nabuhay upang maghari ang pag-ibig at kapayapaan ng Diyos. Nawa ito ang maging tanda at saksi ng bawat alagad ni Kristo. Peace is not the way. Peace is the only way,” ayon pa sa panalangin ni Fr.Pascual.
Naitala ng United Nations Development Programme (UNDP) at ng Oxford Poverty and Human Development Initiative na malaking dahilan sa paglobo ng kahirapan ang mga digmaan.
Sa kanilang pag-aaral nakakaranas ng Multidimensional Poverty Index (MPI),1.1 bilyong katao ang dumaranas ng kahirapan dahil sa mga sigalot at digmaan.
