1,224 total reads
Ilulunsad ng Diocese of Virac ang unang taon ng kanilang Diocesan Synodal Pastoral Plan bilang bahagi ng patuloy na pagsusulong ng pakikilahok, pakikipag-ugnayan at sama-samang paglalakbay ng mga mananampalataya sa buhay at misyon ng Simbahan.
Isasagawa ang paglulunsad sa Solemn Thanksgiving Mass sa August 27, sa ganap na alas-singko ng hapon sa Immaculate Conception Cathedral sa Virac, kasabay ng pagdiriwang ng ika-52 anibersaryo ng pagkakatatag ng diyosesis.
Pangungunahan ni Legazpi Bishop Joel Baylon ang Banal na Misa, na bahagi rin ng paggunita sa Solemnity of the Dedication of the Immaculate Conception Cathedral.
Ayon sa diyosesis, ang Synodal Pastoral Year 2026–2027 ay nakatuon sa “participation and formation” o aktibong pakikilahok at paghubog sa pananampalataya ng bawat kasapi ng Kristiyanong pamayanan.
Tampok sa opisyal na logo ng pastoral year ang mapa ng Catanduanes, Eukaristiya, simbahan, bukas na Bibliya, pastoral staff at mga taong magkakasamang naglalakad.
Kinakatawan ng mga taong naglalakad ang diwa ng synodality na sama-samang paglalakbay ng sambayanan ng Diyos at nagbibigay-diin sa pagkakaisa, pakikilahok at paninindigang “walang maiiwan.”
Itinatampok naman ng bukas na Bibliya ang Salita ng Diyos bilang pundasyon ng pananampalataya, paghubog at pagiging alagad, habang ang Eukaristiya sa sentro ng logo ay sumasagisag kay Kristo bilang puso at bukal ng buhay at misyon ng Simbahan.
Samantala, ang mga kamay na may hawak sa pastoral staff ay sumasagisag sa “shared responsibility” o magkatuwang na pananagutan ng buong sambayanan ng Diyos sa misyon ng Simbahan.
Sa paglulunsad ng pastoral plan, hinihikayat ng diyosesis ang mga pari, mga relihiyoso at mga layko ng Catanduanes na makiisa bilang isang pamayanan sa panibagong yugto ng kanilang pastoral journey.
Layunin ng unang taon ng Diocesan Synodal Pastoral Plan na higit pang mapalalim ang pakikinig sa isa’t isa, pakikilahok sa buhay ng Simbahan, at paghubog ng mga mananampalataya upang sama-samang maisabuhay ang misyon ng Simbahan.
Kasalukuyang pinamumunuan ni Bishop Luisito Occiano ang diyosesis, at siya rin ang namumuno sa Office on Synodal Transformation ng Catholic Bishops’ Conference of the Philippines na nangangasiwa sa pagpapatupad ng synodality sa lokal na simbahan sa Pilipinas.
