254 total views
Nilingap ng Diyosesis ng Kalookan ang mga naulilang indibidwal sa giyera kontra droga ng pamahalaan.
Ibinahagi ni Sr. Maria May Cano, OP ang Executive Secretary ng Commission on Social Service and Development Ministry ng diyosesis na kinalinga nila ang mga kabataang nawalan ng magulang at ang mga asawang nawalan ng katuwang sa buhay na biktima ng extra judicial killings.
“Layunin namin ay tumulong at tumugon sa mga widows at orphans na matugunan ang pangangailangan ng mga naulila sa giyera kontra droga,” pahayag ni Sr. Cano sa Radio Veritas.
Ayon sa Madre, naglaan ng pondo ang diyosesis sa pamumuno ni Bishop Pablo Virgilio David, ang kasalukuyang bise presidente ng Catholic Bishops Conference of the Philippines upang matustusan ang pagpapaaral sa mahigit 30 kabataan na nasa grade school, high school at kolehiyo.
Pebrero ng taong kasalukuyan nang aprubahan ni Bishop David ang EJK victims’ Children Scholarship program upang mabigyang edukasyon ang mga kabataan, mailayo sa masasamang gawain at tulungang hubugin ang pagkatao bilang bahagi ng lipunan.
Ang inisyatibo ng Obispo ay pagpapakita ng konkretong pagtugon sa suliraning pagkaulila ng mga kabataan dahil sa pagkakapaslang ng mga magulang na isinangkot sa ipinagbabawal na gamot.
Inihayag din ni Sr. Cano na katuwang ng diyosesis sa programa ang ilang grupo tulad ng Tanging Yaman sa pangunguna ni Rev. Fr. Manoling Francisco, SJ, Ninoy-Cory Aquino Foundation na nagsagawa ng konsiyerto noong ika – 22 ng Hulyo, 2018 kung saan nakalikom ito ng 3 – milyong piso na inilaan sa scholarship program ng mga kabataan.
PAGBIBIGAY PAGSASANAY, ISIPIRITWAL, MORAL AT PANGKABUHAYAN
Bukod sa pagpapaaral sa mga kabataan ay pinagtutuunan din ng pansin ng Diyosesis ang mga asawang nawalan ng katuwang sa pagtataguyod ng kanilang mga anak.
“Ang mga parents naman ay binibigyan ko ng formation program, monthly po ito once a month po,” ani ni Sr. Cano. Ang mga formation na ibinahagi ng madre ay nakatuon sa iba’t ibang mga paksa tulad ng Laudato Si, stress management, how to handle trauma at iba pa upang mabigyan ng mas malawak na kaalaman ang mahigit sa 30 mga indibidwal na kasapi dito.
Binibigyan din ng pagkakataon ang mga kasapi na matutuhan ang paggawa ng mga produktong maaring mapagkakakitaan upang magkaroon ito ng hanapbuhay at maitataguyod ang kanilang pamilya.
Nauna nang natapos ang pagtuturo sa jewelry making kung saan anim ang nagtagumpay habang susunod naman ang pagtuturo ng acupuncture, isang uri ng alternatibong panggagamot.
Bukod dito ay mayroon ding mahigit 30 volunteers ang diocese sa Kaagapay program na nagbibigay ng counselling sa mga pamilyang nakararanas ng trauma dulot ng karahasan at pagkakapaslang ng kanilang mahal sa buhay.
Ang mga volunteers ay sumailalim sa mga pagsasanay sa Catechetical Foundation of the Archdiocese of Manila (CFAM) habang ilan naman ay nakapagtapos sa ilang institusyong pang-edukasyon.
DRUG REHABILITATION PROGRAM
Taliwas sa paratang ni Pangulong Rodrigo Duterte na sangkot si Bishop David sa ipinagbabawal na gamot, aktibo ang Obispo sa paglunsad ng mga programang tumutulong sa mga nasangkot sa iligal na droga upang mabigyang lunas dahil ang adiksyon ay maituturing na uri ng sakit ng tao.
Katuwang ng diyosesis sa Salubong program, ang lokal na pamahalaan ng Kalookan, Malabon at Navotas na layuning matulungan ang sumukong drug addict na makapagbagong buhay.
Ang Task Force Salubong ay inilunsad ng diyosesis noong Oktubre 2016 at daan-daan na ang recoveries.
Batay sa Programang Pangrehabilitasyon ng Diocese ng Caloocan magkakaroon ng after care ang mga recoveries kung saan patuloy ang pagtitipon ng kanilang mga support group sa tulong ng mga Professional Counsellors upang matiyak na hindi babalik sa iligal na gawain.
