628 total views
Ikinalungkot ng Obispo ang desisyon ni Pangulong Rodrigo Duterte na tuluyang wakasan ang pakikipag-usap sa komunistang grupo.
Ayon kay Kalookan Bishop Emeritus Deogracias Iñiguez, mahalaga ang pagkakaroon ng kapayapaan sa isang pamayanan at ang pakikipag-usap ang isa sa mga epektibong pamamaraan upang matamo ito.
“Ang kapayapaan ay kailangan natin kaya ang lahat na maari nating gawin para ito matamo dapat natin pagtiyagaan at pagsumikapan, ang peace talk ay mabisang pamamaraan upang magtamo ang pagkakasundo at kapayapaan,” pahayag ni Bishop Iñiguez sa Radio Veritas.
Inihayag ng Obispo ang kalungkutan sa pagkakaiba ng pananaw at kaisipan ng pamahalaan at makakaliwang grupo na nagpapalubha sa hindi pagkakasundo na maaring magdulot ng labanan at karahasan sa lipunan.
Sa talumpati ni Pangulong Duterte sa Davao City noong ika – 26 ng Nobyembre, binigyan diin nitong wala nang pag-uusap sa pagitan ng New People’s Army, ang armed wing ng Communist Party of the Philippines at National Democratic Front of the Philippines.
Inihayag pa ng Pangulo ang full scale war ng mga sundalo at mga rebelde kung saan maging ang mga paramilitary ay hinimok na tumulong sa pagtugis sa mga rebelde.
Dahil dito, nangangamba si Bishop Iñiguez na magbubunga lamang ito ng kasamaan sa mamamayan tulad ng pagkitil ng buhay ng mga tao.
PEACE NEGOTIATIONS
Umaasa ang Obispo na mapag-iisipan ng mga nangangasiwa at nagsusulong ng usapang pangkapayapaan na ipagpatuloy ito dahil labis na kailangan ng bansa ang pagkakaisa at pagkakasundo.
“Sana mapag-iisipan na ituloy kasi kailangan natin ang kapayapaan at pagkakasundo,” dagdag pa ni Bishop Iñiguez.
Sa kabila nito, patuloy pa rin si Bishop Iñiguez katuwang ang mga Ecumenical groups sa pagsusulong ng usapang pangkapayapaan para na rin sa kapakanan ng bansa at mamamayan.
Bagamat ikinalungkot ang pahayag ng Pangulo na tapusin ang pakikipag-usap, sinisikap ng Obispo at mga kasamahan sa tulong ng panalangin ay maipakilala at maipapaunawa sa mamamayan ang kahalagahan ng peace talks.
BANSANG MARANGAL AT MAPAYAPA
Hinimok ni Bishop Iñiguez si Pangulong Duterte at ang mga opisyal sa pamahalaan na gumawa ng kagyat na mga hakbang sa pagtugon sa hindi pagkakasundo at mawakasan ang halos 5 dekadang pakikibaka ng mga komunista upang matamo ang mapayapang Pilipinas.
Iginiit ng Obispo na isa sa pundasyon ng matatag, marangal at maunlad na bansa ay ang pagkakaroon ng pagkakaisa at kapayapaan.
“Kung matatamo, mapanatili at mapaunlad ang ating kapayapaan tayo ay maging isang bansang tunay na marangal at tunay na kalugod-lugod sa Panginoong Maykapal.” pahayag ng Obispo sa Radio Veritas
