227 total views
Binigyang-diin ni Caritas Manila Executive Director Fr. Anton CT Pascual ang kahalagahan ng edukasyon bilang susi sa pag-ahon ng mga kabataang mahihirap at pagbubukas ng mas maayos na kinabukasan.
Ito ang mensahe ni Fr. Pascual sa isinasagawang YSLEP Telethon 2026 ng Caritas Manila katuwang ang Radyo Veritas, na may temang “Opening Doors, Transforming Lives.”
Ayon kay Fr. Pascual, taun-taon ay mahigit isang libong iskolar ang nakapagtatapos sa kolehiyo sa tulong ng programa, na layuning putulin ang siklo ng kahirapan sa pamamagitan ng edukasyon.
Nilinaw ng Pari na ang edukasyon ang pangunahing sandata laban sa kahirapan, kamangmangan, at kawalan ng oportunidad.
“Kung gusto po nating kalabanin ang kahirapan, kamangmangan at kawalan, edukasyon ang susi at iyan ang buod ng YSLEP (Youth Servant Leadership and Education Program) ng Caritas Manila,” ayon kay Fr. Pascual.
Tiniyak din ng Caritas Manila ang patuloy na pagtulong at pag-agapay sa mga pamilyang kapos sa pinansyal na kakayahan upang maipagpatuloy ng mga kabataan ang kanilang pag-aaral.
Patuloy ang panawagan ng simbahan sa publiko na makiisa at suportahan ang mga programang nagbibigay ng pag-asa at pagkakataon sa kabataang Pilipino.
“Charity begets charity.”
Ibinahagi ni Fr. Pascual na ang mahigit sa isang libong YSLEP scholars na nagtapos sa kolehiyo kada taon ay nagiging miyembro ng Caritas Manila Alumni Scholars Association (CAMASA)- na sila namang nagiging katuwang ng simbahan para sa pagtulong sa mga bagong scholar ng Caritas Manila.
Sa tala, umaabot na sa 15 libo ang aktibong miyembro ng CAMASA na taunan ding nakakalikom ng P3 milyong para sa YSLEP.
Ipinaliwanag ni Fr. Pascual, naglalaan ang YSLEP ng P35 hanggang P50 libo bawat scholar kada taon, para sa kanilang pag-aaral. Ilan din sa mga mag-aaral ay kinakailangang tumira sa mga boarding house dahil na rin sa layo ng kanilang lugar mula sa mga unibersidad.
Bukod sa pagbabalik ng tulong sa mga bagong scholar, nagsisilbi rin ang CAMASA sa pagtulong sa mga bagong nagsipagtapos na makahanap ng trabaho.
