7,662 total views
Nagsampa ng reklamong plunder at technical malversation sa Office of the Ombudsman si physician at public health advocate, Dr. Tony Leachon laban kina Finance Secretary Ralph Recto at iba pang opisyal ng gabinete.
Kaugnay ito ng paglilipat ng ₱60 bilyong pondo ng Philippine Health Insurance Corporation (PhilHealth) at ₱107 bilyon mula sa Philippine Deposit Insurance Corporation (PDIC).
Sa pamamagitan ng Nabua Law Office, iginiit ni Leachon na labag sa Universal Health Care Law at mga probisyon ng Sin Tax Law ang paglilipat ng pondo ng PhilHealth sa National Treasury dahil nakalaan ito para sa serbisyong pangkalusugan ng mga indigent member at primary care programs.
“This claim collapses under the Universal Health Care Law and Sin Tax earmarking provisions, which mandate that these funds remain within PhilHealth to support indigent members and primary care,” pahayag ni Leachon.
Ayon kay Leachon, nagresulta ang naturang hakbang sa kakulangan sa pondo ng PhilHealth mula 2023 hanggang 2025, hindi nabayarang mga ospital, at kakulangan sa suporta para sa cancer at dialysis programs.
Iginiit din niya na pinahina ng paglilipat ng ₱107 bilyong pondo mula sa PDIC ang proteksyon para sa mga depositor at bumaba ang tiwala ng publiko sa sistema.
Kabilang sa mga isinampang reklamo ang paglabag sa Republic Act No. 7080 o Plunder Law at Article 220 ng Revised Penal Code kaugnay ng technical malversation.
Nilinaw naman ni Leachon na hindi pulitika ang isinusulong ng kaso kundi pananagutan sa maling paggamit ng pondong inilaan para sa kalusugan at kapakanan ng mamamayan.
“Sec. Recto has alluded that this issue is being “fanned” by politicians… No rhetoric can erase the human cost of these diversions,” ayon kay Leachon.
Nanindigan ang doktor na patuloy niyang isusulong ang kaso bilang pribadong mamamayan para sa integridad at kapakanan ng susunod na henerasyon ng mga Pilipino.
“Power does not excuse betrayal. Integrity must prevail,” giit ni Leachon.
Binibigyang-diin sa Katuruang Panlipunan ng Simbahan na ang pampublikong pondo ay dapat ilaan para sa kabutihan ng nakararami, lalo na ng mahihirap, alinsunod sa katarungang panlipunan at prayoridad sa mga dukha.
