23,016 total views
Gamitin ang pamamagitan ni Hesus at ni Maria upang mahilom ang mga may sakit at nakakaranas ng pagsubok sa buhay.
Ito ang mensahe ng pagninilay ni Cubao Bishop Honesto Ongtioco sa kaniyang pagdiriwang ng misang iniaalay bilang paggunita sa Kapistahan ng Our Lady of Lourdes at ika 32 paggunita ng World Day of the sick tuwing February 11 sa National Shrine of Our Lady of Lourdes sa Quezon City.
Ayon kay Bishop Ongtioco, bagamat pasakit ang mga nararanasang karamdaman, nawa ay maituring itong biyaya dahil narin sa bisa nito ay nagiging pamamagitan ng Diyos ang indibidwal upang maging daluyan ng kaniyang pagmamahal o habag para sa sangkatauhan.
Sa tulong din ng ibat ibang uri ng sakit, ay napaghihilom ng pamilya, magkakaibigan o kapwa ang mga hindi pagkakaintidihan kung saan nagkakaroon ng pagkakataon upang mag usap o makipagdiyalogo ang isat isa sa kapwa.
“Hilingin natin sa Mahal na Ina sa ating paglapit sa kaniya sa araw na ito matularan natin ang kaniyang malalim na pakikipag-ugnayan sa Diyos, pananampalataya, matularan natin ang kaniyang anak: si Hesus, express his love the very concrete and yet difficult weight of the cross, malapit na po ang Semana Santa,” ayon sa pagninilay ni Bishop Ongtioco sa kapistahan.
Mensahe naman ni Father Jefferson Agustin, OFMcap na Rector at Parish Priest ng dambana, ini-atang ng Panginoon sa sanlibutan ang misyon ng pangangalaga sa mga maysakit at pinakanangangailangan.
Ayon sa Pari, mahalagang maisabuhay sa lipunan ang pagkalinga sa may mga karamdaman dahil katulad ni Maria ay naranasan din niya ang ibat-ibang pasakit bilang ina ni Hesus Kristo.
Panalangin ni Fr.Agustin na maisabuhay parin ng mga mananampalataya ang kanilang tema sa pagdiriwang na “Maria, pintakasi ng pagpapagaling at pagkakawanggawa,” upang patuloy na maging daluyan ng pagi-ibig o habag ng Panginoon sa kapwa.
“Kaya dito sa ating pambansang dambana ng Mahal na Birhen ng Lourdes, ang programa natin dito ay una sa lahat yung tuwing sabado, ay mayroon tayong mass for the sick at ipinapanalangin natin lahat ng may mga sakit ay gayundin ay nagkakaroon din tayo ng sacramento ng mga pagpapahid ng langis sa may mga sakit, at gayundin din ang pagbabasbas ng Eukaristiya sa lahat ng may mga sakit at gayundin, ang Mahal na Birhen ng Lourdes ay dinadala natin sa mga Ospital na nagpapaalala sa mga may sakit na ang Mahal na Birhen ng Lourdes ay nananalangin para sa kanila,” ayon naman sa panayam ng Radio Veritas kay Fr.Agustin.
Ginugunita na tuwing February 11 ang Kapistahan ng Our Lady of Lourdes na sa loob ay 32 ay kasabay ng World Day of the sick matapos italaga ni dating Santo Papa Saint John Paull II ang araw ng paggunita upang alalahanin o kalangain ang mayroong may mga sakit sa lipunan.
