Walang makakatinag sa pag-asa na hatid ni Hesus-Bishop Occiano

 20,590 total views

Inihayag ni Virac, Catanduanes Bishop Luisito Occiano na walang sakuna ang makatitinag sa pag-asang hatid ng paghahari ni Kristo sa sanlibutan.

Ito ang mensahe ng obispo kasabay ng pagdiriwang ng Dakilang Kapistahan ng Kristong Hari, ilang araw matapos ang pananalasa ng Super Typhoon Uwan sa lalawigan.

Ayon kay Bishop Occiano, nananatili ang paghahari ni Kristo at ang matatag na pananampalataya ng mga Catandunganon sa kabila ng malawakang pinsala.

“In these difficult days, the Spirit has revealed something deeper than destruction: the resilience, unity, and unyielding faith of the people of Catanduanes – stronger than the winds, steadier than the floodwaters, and brighter than the darkness left in the storm’s wake,” pahayag ni Bishop Occiano.

Ibinahagi rin ng obispo ang mga napagkasunduan sa ginanap na Clergy Assembly ng diyosesis, kabilang ang pagpapalakas ng disaster preparednes sa tulong ng Parish Pastoral at Barangay Councils, at maging Caritas hubs.

Paiigtingin ng diyosesis ang pagbisita sa mga tahanan, pananalangin kasama ang mga pamilya, at mas aktibong presensya ng mga pari sa mga pamayanan.

“Our parish social services and Caritas desks must be strengthened so the Church remains a constant, compassionate, and listening presence to our poor and most vulnerable families,” ayon sa obispo.

Hinimok din ni Bishop Occiano ang pagpapatuloy at pagpapalawak ng bayanihang Catandunganon, mula sa muling pagtatayo ng mga tahanan at kabuhayan hanggang sa pagsuporta sa mga programang tumutugon sa pangangailangan ng mahihirap tulad ng feeding at health assistance.

Bahagi rin ng pastoral statement ang mas matatag na panawagan para sa pangangalaga ng kalikasan bilang mahalagang bahagi ng pagbangon, kabilang ang pagtutol sa anumang mapaminsalang gawain sa kapaligiran.

Kabilang sa panawagan ng obispo ang pagpapatibay ng moral na pundasyon ng komunidad sa pamamagitan ng patuloy na paghuhubog para sa kabataan, pamilya, mga lider, at mga pari.

Nagpahayag din si Bishop Occiano ng taos-pusong pasasalamat sa lahat nagpaabot ng tulong at suporta, lalo na sa mga paring naglingkod sa gitna ng unos.

Gayunman, aminado ang obispo na mahaba pa ang landas ng rehabilitasyon, kaya naman hiniling nito ang patuloy na suporta para sa pagbangon ng isla.

“Together, as one Body, we can restore hope with dignity… As we honor Christ our King, let us journey forward with courage, gratitude, and renewed hope,” saad ni Bishop Occiano.

Bayombong Bishop Mangalinao, nanawagan ng malawakang pagkilos kontra pagmimina sa Nueva Vizcaya

 11,275 total views

Nanawagan si Bayombong Bishop Jose Elmer Mangalinao ng mas matatag na pagkilos laban sa mapaminsalang pagmimina at sa pangangalaga ng kabundukan at watershed ng Nueva Vizcaya.

Sa pahayag matapos ang pagpupulong ng Religious and Civic Leaders Against Mining noong November 17, 2025, binigyang-diin ng obispo na ang banta ng pagmimina sa lalawigan ay hindi lamang lokal na usapin, kundi panganib na maaaring makaapekto sa buong Cagayan Valley Region.

Ayon kay Bishop Mangalinao, ang kabundukan at kagubatan ng lalawigan ang pinagmumulan ng tubig ng Magat at Cagayan River systems na bumubuhay sa mga sakahan at pamayanan sa Isabela, Quirino, at Cagayan.

“If our watersheds are destabilized, if our rivers are poisoned, or if our mountains are stripped bare, the harm will ripple downstream, affecting our sister provinces in ways both immediate and lasting,” pahayag ni Bishop Mangalinao.

Bilang konkretong hakbang, hinimok ng obispo ang bawat bayan at sektor na lumahok sa sabayang Human Chain sa November 30 bilang pakikiisa sa Trillion Peso March, na naglalayong ipakita ang pagkakaisa at tapang ng mga mamamayan, tulad ng barikada ng mga taga-Dupax del Norte, na araw-araw na nagtatanggol sa lupaing ninuno laban sa pagmimina.

Nanawagan si Bishop Mangalinao na magsuot ng puti ang lahat at isagawa ang pagkilos mula alas-2 hanggang alas-4 ng hapon sa mga pampublikong lugar, tulad ng harap ng simbahan, paaralan, o munisipyo.

Umaasa ang obispo na mapapansin at mapapakinggan ng mga lider sa iba’t ibang antas ang sabayang pagkilos, at hinimok ang mga pinuno ng mga pamayanan na anyayahan ang mga nasasakupan na makiisa bilang patunay ng malasakit at pagmamahal sa lalawigan.

“When we, as Novo Vizcayanos, stand together—simultaneously, visibly, and resolutely—across the province, our collective voice will be harder to ignore… United as children of Nueva Vizcaya, let us act out of shared love and responsibility for this beautiful land we call home,” ayon kay Bishop Mangalinao.

Para sa karagdagang detalye, maaaring makipag-ugnayan kay Fr. Crispin Costales, Social Action Director ng diyosesis sa mga numerong 0917-163-3829.

Katarungang pangklima, panawagan ng PMPI sa COP30 summit

 17,485 total views

Nanawagan ang Philippine Misereor Partnership, Inc. (PMPI) sa mga delegado ng 30th United Nations Framework Convention on Climate Change (UNFCCC) o Conference of Parties (COP30 Summit) sa Belem, Brazil, agad na kumilos para sa tunay na katarungang pangklima, lalo na sa harap ng matitinding pinsala mula sa sunod-sunod na sakuna sa Pilipinas.

Ayon sa grupo, hindi “galit ng kalikasan” ang nagpapahirap sa mga Pilipino, kundi ang patuloy na kapabayaan at maling pamamahala.

“Instead of systematically advancing adaptation and resilience, some of our adaptation measures, such as flood-control infrastructure, have increasingly become a loot bag for our political leaders and their dynastic families,” pahayag ng PMPI.

Iginiit ng PMPI na dapat grant-based at madaling ma-access ang Loss and Damage Fund, at hindi dapat ipasa sa mga mahihirap at mahihinang bansa tulad ng Pilipinas, ang gastos ng krisis sa klima.

Mariin ding kinondena ng grupo ang mga pekeng solusyon tulad ng carbon markets at geoengineering, na ginagamit lamang para makaiwas sa pananagutan ang malalaking polluter.

Tinuligsa rin ng PMPI ang malakas na impluwensiya ng malalaking kumpanya sa mga usaping pangklima at ang paggamit ng “greenwashing” upang pagandahin ang anyo ng mapaminsalang proyekto.

Para sa PMPI, ang tunay na solusyon ay nakabatay sa pangangalaga ng kalikasan, karapatan ng mga pamayanan, at paggalang sa mga katutubo.

Hinikayat din ng grupo ang mabilis na paghinto ng fossil fuel expansion, large-scale mining, at labis na pagkuha ng likas-yaman, habang isinusulong ang mga tunay na makakalikasang solusyon na nakatuon sa kalikasan at tao.

“COP30 must deliver more than words. It must deliver justice. PMPI joins Mother Nature, frontline communities, civil society, and global movements in demanding a World Order that ensures a climate future built on accountability, equity, and the protection of our common home,” saad ng PMPI.

Kaugnay nito, una nang nanawagan si Catholic Bishops’ Conference of the Philippines President, Kalookan Bishop Pablo Virgilio Cardinal David, sa COP30 Summit para sa ecological conversion at pagtalikod sa mga maling solusyon na nagpapahintulot sa mayayamang bansa at korporasyon na ipagpatuloy ang negosyo habang ang mga mahihirap bansa ang higit na apektado ng pinsala.

Isasagawa ang COP30 Summit mula November 10 hanggang 21, 2025, at ito rin ang unang pagbabalik ng global climate summit sa Brazil, na unang naging host ng 1992 Rio Earth Summit kung saan pinagtibay ang UNFCCC.

Cardinal David, nanawagan ng makatarungang ‘climate action’sa COP30 Summit

 26,242 total views

Ibinahagi ni Kalookan Bishop Pablo Virgilio Cardinal David, pangulo ng Catholic Bishops’ Conference of the Philippines ang kalagayan at panawagan ng bansa sa isinasagawang 30th United Nations Framework Convention on Climate Change o Conference of Parties (COP30 Summit) sa Belem, Brazil.

Hiniling ni Cardinal David ang panalangin para sa bansa na muling sinubok ng magkakasunod na kalamidad, isang paalala ng lumalalang kahinaan ng buhay sa rehiyong madalas tinatamaan ng malalakas na sakuna.

Inalala ng kardinal ang trahedyang idinulot ng pananalasa ng Supertyphoon Yolanda noong 2013 na kumitil ng libo-libong buhay at nag-iwan ng malawak na pinsala, na hanggang ngayon ay hindi pa rin napapawi sa alaala ng sambayanan.

“Many of us still carry the scars of that tragedy. And yet, in the span of just two decades, we have been enduring stronger, wetter, and deadlier typhoons across the Western Pacific, storms that form more quickly, intensify more violently, and devastate more communities than ever before,” ayon kay Cardinal David.

Iginiit ni Cardinal David na nagpapakita ang mga pag-aaral na dahil sa umiinit na Western Pacific—ang pinakamainit na ocean basin sa mundo—ay mas mabilis at mas matindi ang mga nabubuong bagyo, at kasabay nito ang pagkamatay ng coral reefs na pinagmumulan ng mga puting buhangin sa mga tanyag na dalampasigan ng bansa.

Tinukoy ng kardinal na ang Pilipinas, na ngayo’y itinuturing na pinaka-disaster-prone na bansa, ay tumataas ang pangingibang bansa ng mga tao dahil sa lumalalang sakuna, habang ang labis na urbanisasyon at hindi maayos na pamamahala sa basura ay nagpapalala sa pagdurusa ng mahihirap at pagkasira ng kapaligiran.

“Creation groans—and creation’s cry is the cry of our people,” saad ng kardinal.

Binigyang-diin ni Cardinal David ang mahalagang panawagan ng mga obispo ng Global South, ang Symposium of Episcopal Conferences of Africa and Madagascar (SECAM), Latin American and Caribbean Episcopal Council (CELAM), at Federation of Asian Bishops’ Conferences (FABC), para sa ecological conversion at pagtalikod sa mga maling solusyon tulad ng carbon markets at offsets na aniya’y nagpapahintulot sa mayayamang bansa at korporasyon na ipagpatuloy ang negosyo habang ang mga mahihinang bansa ang higit na apektado ng pinsala.

Isinulong din ng kardinal ang Earth Tariff, isang mekanismong pinapanagot ang industriya ng pagmimina bago pa man mangyari ang pinsala, na inihain ng Mindanao-Sulu Pastoral Conference.

Aniya, hindi lamang ito panukalang pondo, kundi konkretong hakbang tungo sa katarungan, pangangalaga sa kalikasan, at tunay na pagbabago.

Sa huli, nanawagan si Cardinal David na harapin ng mundo ang krisis nang may pananampalataya, tapang, at pagkakaisa para pangalagaan ang nag-iisang tahanan.

“May we, as a people, stand together—as prayerful disciples, prophetic witnesses, and courageous custodians of the Earth God has entrusted to us,” tagubilin ni Cardinal David.

Isasagawa ang COP30 Summit mula November 10 hanggang 21, 2025, at ito rin ay isang mahalagang pagkakataon dahil bumalik ito sa Brazil, ang unang host ng 1992 Rio Earth Summit kung saan pinagtibay ang UNFCCC.

Alamin ang pinagmumulan ng krisis sa climate change, hamon ng Pari sa pamahalaan

 44,236 total views

Nanawagan si Quezon for Environment (QUEEN) convenor Fr. Warren Puno na huwag lamang ituon sa mga flood control projects ang pagtugon sa mga kalamidad, kundi siyasatin at tugunan ang pinagmumulan ng patuloy na pagkasira ng kalikasan na nagdudulot ng mas matinding epekto ng climate change.

Ayon kay Fr. Puno, ang sunod-sunod na malalakas na bagyo at malawakang pagbaha sa iba’t ibang bahagi ng bansa ay patunay ng lumalalang krisis sa klima, na higit pang pinapalala ng hindi makatarungang paglapastangan sa mga kabundukan at kagubatan kapalit ng pag-unlad.

“Ang panawagan natin ay hindi lang siyasatin ang flood control, kundi alamin ang tunay na dahilan ng pagbaha. At ito ay walang iba kundi ang patuloy na pagkasira ng kabundukan. Kaya’t kung bakit malalakas ang mga bagyo at malalawak ang pagbaha ay dahil na rin sa climate change,” pahayag ni Fr. Puno sa panayam ng Radyo Veritas.

Binigyang-diin din ng pari na kailangang ihinto na ang mga gawaing nagpapalala sa climate crisis, tulad ng patuloy na pagtatayo at pagsuporta sa mga coal fired power plant na gumagamit ng fossil fuel.

Bagamat nakatutulong ito sa pagkakaroon ng suplay ng kuryente sa bansa, ang maruming usok mula rito ay nagdudulot naman ng panganib sa kalusugan sa mga apektadong pamayanan.

Hinimok ni Fr. Puno ang pamahalaan na pag-aralang muli ang patuloy na paggamit ng fossil fuel at isaalang-alang ang ganap na paglipat sa malinis at ligtas na renewable energy.

“So, ‘yun ‘yung ating panawagan sa pamahalaan na muling pag-aralan kung talagang kailangan at kailangan na ba talaga nating mag-switch sa renewable energy,” ayon kay Fr. Puno.

Fossil Fuel Non-Proliferation Treaty, suportado ng Caritas Philippines

 29,072 total views

Suportado ni Caritas Philippines Vice President, San Carlos Bishop Gerardo Alminaza, ang layunin ng Fossil Fuel Non-Proliferation Treaty bilang makataong tugon sa patuloy na krisis sa klima.

Ayon kay Bishop Alminaza, na itinalaga rin bilang Bishop Champion for Integral Ecology ng Catholic Bishops’ Conference of the Philippines (CBCP), tungkulin ng Simbahan na magsalita at kumilos upang pangalagaan ang kalikasan, na itinuturing na tahanan ng lahat.

Aniya, panahon na upang tutulan ang patuloy na paggamit ng coal, fossil gas, at iba pang mapaminsalang pinagkukunan ng enerhiya na nagpapalala sa epekto ng climate change, alinsunod sa 2022 Pastoral Letter on Ecology ng CBCP.

“In our 2022 Pastoral Letter on Ecology, the Catholic Bishops’ Conference of the Philippines calls on all of us-as shareholders, clients, and stakeholders of financial institutions-to use our influence to demand the phaseout of coal, fossil gas, and other destructive energy sources in accordance with the global goal of limiting warming to 1.5°C,” pahayag ni Bishop Alminaza.

Sinabi ni Bishop Alminaza na ang Fossil Fuel Non-Proliferation Treaty ay nagbibigay ng konkretong hakbang para sa mga pamayanan, simbahan, at pamahalaan upang magtulungan sa pagtataguyod ng mga layunin para sa kalikasan batay sa katarungan, malasakit, at pananagutan.

Dagdag pa ng obispo, ito ay pandaigdigang panawagan para sa pagiging bukas at pananagutan sa pamamagitan ng makatarungang pagbabago, na nakaugat sa Katuruang Panlipunan ng Simbahan at sa ensiklikal na Laudato Si’ ni Papa Francisco.

Binanggit ni Bishop Alminaza ang paalala ng yumaong Santo Papa na mas epektibo ang mga lokal na batas kung may pagkakaisa sa mga karatig na pamayanan upang suportahan ang parehong patakarang pangkalikasan.

Iginiit ng obispo na dapat magsilbing patnubay sa pananampalataya at pagkilos ang panawagan ng Simbahan upang tugunan ang daing ng kalikasan at ng mga mahihirap na unang naaapektuhan ng krisis sa klima.

“May those entrusted with leadership in our communities prayerfully discern and consider endorsing this call. Together, let us lead the faithful toward a sustainable future rooted in justice, compassion, and care for God’s creation,” ayon kay Bishop Alminaza.

Damage assessment sa pinsala ng bagyong Uwan, isinasagawa ng Diocese of Imus

 32,599 total views

Patuloy ang isinasagawang damage assessment at validation ng humanitarian at social arm ng Diocese of Imus upang matukoy ang lawak ng pinsalang iniwan ng Bagyong Uwan, lalo sa mga pamayanang nasa baybayin ng Cavite.

Ayon kay Jerel Tabong, Humanitarian Response Coordinator ng Caritas Imus, patuloy pa nilang sinusuri at tinataya ang pinsala sa mga bahay at ari-arian sa mga lugar na matinding naapektuhan ng bagyo.

“On-going pa rin ang aming damage assessment at validation sa mga nasirang bahay lalo na sa coastal areas,” ayon kay Tabong sa panayam ng Radyo Veritas.

Nakikipag-ugnayan na rin ang Caritas Imus sa mga lokal na pamahalaan upang matukoy ang agarang pangangailangan ng mga pamilyang naapektuhan at makapagsagawa ng relief operations sa mga susunod na araw.

Batay sa situational report, nasa 18,364 indibidwal o 5,014 pamilya mula sa 21 bayan at lungsod ng Cavite ang inilikas sa 191 evacuation centers, karamihan mula sa lungsod ng Bacoor, at mga bayan ng Ternate at Silang.

Sa kasalukuyan, wala namang naiulat na nasawi o nasugatan sa pagdaan ng Bagyong Uwan.

Hinihikayat ng Diyosesis ng Imus ang publiko na ipagpatuloy ang pananalangin at pagbibigay-tulong sa mga naapektuhang residente habang nagpapatuloy ang pagtugon ng Simbahan sa mga nasalanta ng bagyo.

Let us help one another, panawagan ng CBCP sa mga Pilipino

 41,806 total views

Nanawagan ang humanitarian at development arm ng Catholic Bishops’ Conference of the Philippines (CBCP), sa sambayanang Pilipino na magkaisa sa pananampalataya, pagkakawanggawa, at pagkilos, habang hinaharap ang mga pagsubok dulot ng pananalasa ng bagyong Tino at ng isa pang sama ng panahong papalapit sa bansa.

Ayon kay Kidapawan Bishop Jose Colin Bagaforo, pangulo ng Caritas Philippines, ang kahandaan at malasakit ng bawat isa ang tunay na sukatan ng pagkatao bilang isang sambayanan.

“Let us help one another—volunteer, share what we can, and pray for those affected,” ayon kay Bishop Bagaforo.

Hinimok ng Caritas Philippines ang mga parokya, diocesan social action centers, civil society organizations, at mga volunteer na magtulungan sa pagbabahagi ng agarang tulong at serbisyong pangkomunidad sa mga nasalanta.

Tiniyak din ng humanitarian arm ng simbahan ang patuloy na pakikipag-ugnayan sa mga lokal na simbahan at organisasyon upang maghatid ng tulong sa mga pamilyang nawalan ng tirahan, kabuhayan, at kapanatagan.

Kasabay nito, umapela si Bishop Bagaforo sa mga civil society at people’s organizations na magkaisa sa paghahatid ng relief operations bilang pagpapakita ng diwa ng bayanihan at solidarity

“When we stand together—when we pray, give, and serve together—we become instruments of God’s mercy. Gold is tested by fire, and our faith is refined through trials. May this be a time of renewed commitment to love and service,” saad ni Bishop Bagaforo.

Nanawagan din ang Caritas Philippines ng patuloy na pananalangin para sa kaligtasan at katatagan ng mga apektado ng kalamidad, at maghatid ng suporta sa pamamagitan ng donasyon, volunteer work, o mga gawaing pangkomunidad.