Veritas PH

The WORD. The TRUTH.

ENVIRONMENT NEWS

Archbishop Uy sa Pasko at Bagong Taon: Pagnilayan ang diwa ng pagdiriwang, iwasan ang mapanganib na kaugalian

Wednesday, December 24, 2025 3:54 pm

 18,469 total views

Hinimok ni Cebu Archbishop Alberto Uy ang mga mananampalataya na pagnilayan ang tunay na diwa ng pagdiriwang ng Pasko ng Pagsilang ng Panginoon at ng pagsalubong sa Bagong Taon, kasabay ng panawagang iwasan ang mga kaugaliang nagdudulot ng panganib sa buhay, kalikasan, at pamayanan.

Sa kanyang pastoral appeal, binigyang-diin ng arsobispo na sa halip na saya, kalungkutan ang madalas na naiiwan ng mga mapanganib na selebrasyon—lalo na sa mga batang nasusugatan, pamilyang nawawalan ng mahal sa buhay, matatanda at maysakit na nababalisa, at mga hayop na nasasaktan dahil sa labis na ingay at polusyon.

Ayon kay Archbishop Uy, walang ingay o panandaliang kasiyahan ang mas mahalaga kaysa sa kaligtasan at dignidad ng buhay ng tao, lalo na ng mga bata at ng mga mahihirap at mahihinang sektor ng lipunan.

“God entrusted creation to us—not to abuse it, but to care for it. The smoke that pollutes our air, the debris that poisons our rivers, and the fires that destroy homes are not signs of joy; they are signs that we have forgotten our responsibility as stewards of God’s gifts,” pahayag ng arsobispo.

Hinimok din ni Archbishop Uy ang mga magulang at nakatatanda na maging huwaran at gabay ng kabataan, at ipaunawa na ang tunay na tapang at saya ay hindi nasusukat sa ingay o panganib, kundi sa paggalang sa buhay at sa kaligtasan ng kapwa.

Para naman sa kabataan, binigyang-diin ng arsobispo na ang kanilang lakas at pagkamalikhain ay maaaring magbunga ng makabuluhang pagdiriwang na nagbibigay-liwanag at hindi nagdudulot ng pinsala—sa pamamagitan ng panalangin, pasasalamat, at mga gawa ng pagmamahal, malasakit, at pagkakaisa.

Sa pagtatapos ng kanyang mensahe, iginiit ni Archbishop Uy na ang tunay na diwa ng Pasko ay nasusukat sa malasakit sa kapwa, sa pangangalaga sa kalikasan, at sa pagprotekta sa mga pinakamahihina sa lipunan.

“May our celebrations be remembered not for their noise, but for their compassion. Not for their smoke, but for their light. May God bless you, protect our children, comfort our animals, and guide us all toward a more caring and responsible community,” dagdag pa ng arsobispo.

Diyosesis ng Bayombong, umapela sa Korte Suprema laban sa ilegal na FTAA Renewal ng OceanaGold

Wednesday, December 24, 2025 3:31 pm

 6,068 total views

Naghain ang Diyosesis ng Bayombong, katuwang ang mga apektadong pamayanan ng Nueva Vizcaya, ng Petition for Certiorari sa Korte Suprema laban sa iligal na pag-renew ng Financial or Technical Assistance Agreement (FTAA) ng OceanaGold Philippines, Inc.

Ang petisyon ay kaugnay ng sinasabing paglabag ng OceanaGold sa karapatan ng mga lokal na pamahalaan at sa obligasyon ng pamahalaan na magsagawa ng sapat na konsultasyon at environmental impact assessment sa mga komunidad na maaapektuhan ng pagmimina.

Pinanagunahan ni Bayombong Bishop Jose Elmer Mangalinao, ang paghahain ng petisyon, at sinabing nagkamali ang Bayombong Regional Trial Court (RTC) sa desisyon nitong balewalain ang karapatan ng mamamayan sa makabuluhang public consultations sa proseso ng pag-renew ng FTAA.

“We reiterate that the OGPI FTAA renewal is illegal for failing to consult communities and local authorities whose concerns over the risks we face for the next 25 years of destructive mining were overrode,” pahayag ni Bishop Mangalinao.

Sa petisyon na isinampa noong Disyembre 19, 2025, iginiit na nilabag ng RTC ruling ang Sections 26 at 27 ng Local Government Code, na nag-uutos sa pambansang pamahalaan na magsagawa ng lokal na konsultasyon at kumuha ng pahintulot mula sa mga lokal na pamahalaan bago ipatupad ang anumang environmentally critical project, kabilang ang FTAA renewal ng OceanaGold.

Binanggit din sa petisyon na nagkamali ang RTC sa interpretasyon nito na ang 2019 Addendum at Renewal Agreement ay simpleng pagpapatuloy lamang ng 1994 FTAA. Sa pagtanggap umano sa ganitong pananaw, nilabag ng korte ang probisyon na ang mineral agreement ay may bisa lamang ng 25 taon at maaari lamang i-renew nang isang beses.

Ipinaliwanag naman ni Atty. Ryan Roset, senior legal fellow ng Legal Rights and Natural Resources Center at isa sa mga abogado ng mga petitioner, na ang mga renewal ay sumasaklaw na sa development at utilization phases ng pagmimina, kaya nangangailangan ng mas mahigpit na pagsunod sa batas dahil sa malalim na epekto nito sa kalikasan at mga komunidad.

“Consider for instance that we are now in an era of unprecedented climate crisis that the Didipio mine’s original designs could not have accounted for. Not only should there be prior consultation, but even more so prior approval,” ayon kay Roset.

Sakaling paboran ng Korte Suprema ang petisyon, maaaring ideklarang walang bisa ang 2019 addendum at renewal agreement ng FTAA No. 001 dahil sa paglabag sa batas, at mapipilitang kanselahin ito ng Office of the President.

Diwa ng Pasko pinatingkad ng tulong sa mga pasyente at kawani ng PGH

Tuesday, December 23, 2025 7:04 pm

 17,293 total views

Binigyang-diin ni University of the Philippines–Philippine General Hospital (UP-PGH) Head Chaplain Fr. Marlito Ocon, SJ, ang tunay na diwa ng pagdiriwang ng Pasko ng Pagsilang ng Panginoon sa pamamagitan ng konkretong pagbabahagi ng tulong at biyaya sa mga pasyente at kawani ng ospital na higit na nangangailangan.

Ayon kay Fr. Ocon, higit na pinagpapala ang nagbibigay kaysa tumatanggap, at ang tunay na kagalakan ng Pasko ay hindi nasusukat sa mga regalong binubuksan, kundi sa pagmamahal at pag-asang ibinabahagi sa kapwa, lalo na sa mga nangangailangan ng pag-aaruga at malasakit.

“May our joy be found not in what we unwrap, but in what we share—especially with our brothers and sisters who need love, care, and hope the most,” pahayag ni Fr. Ocon.

Ibinahagi ng pari na natapos na ang pamamahagi ng tulong sa mga charity patients ng PGH. Dahil sa patuloy na pagdating ng mga donasyon, pinalawak pa ang pamaskong handog na grocery at noche buena gift packs para sa humigit-kumulang 280 security guards at mahigit 600 outsourced janitors at utility workers na nasa job order status.

Nakatanggap din ng pamaskong biyaya ang ilang ground maintenance personnel, mga hardinero, parking attendants, at iba pang contractual workers sa loob ng UP Manila campus.

Nagpasalamat si Fr. Ocon sa mga kaibigan at donors na nagpaabot ng tulong, at iginiit na dahil sa kanilang bukas-palad na puso ay lalong nagningning ang liwanag ng Pasko para sa mga higit na nangangailangan.

Dalangin ng pari na nawa’y maging masaya at mapagpala ang Pasko ng lahat, at patuloy na puspusin ng pagpapala ng Diyos ang mga tumulong at nagbahagi ng biyaya sa kapwa.

“You made the light of Christmas shine all the more brightly to our brothers and sisters who needed it the most. God’s blessing be upon you always,” saad ni Fr. Ocon.

Sama-samang pagkilos sa pagtatanggol ng human rights, panawagan ng CBCP-ECSA-JP

Friday, December 12, 2025 12:12 pm

 78,200 total views

Nanawagan ang Catholic Bishops’ Conference of the Philippines – Epsicopal Commission on Social Action, Justice and Peace (CBCP-ECSA-JP)/Caritas Philippines ng mas matatag at sama-samang pagkilos para sa pagtatanggol sa karapatang pantao kasabay ng pagdiriwang ng Human Rights Day at ng ika-77 anibersaryo ng Universal Declaration of Human Rights.

Iginiit ni San Carlos Bishop Gerardo Alminaza, chairman ng CBCP-ECSA-JP at pangulo ng Caritas Philippines, na tungkulin ng pamahalaan, simbahan, at mamamayan na pangalagaan ang karapatan at dignidad ng bawat tao at ng buong sangnilikha, mula sa pagkondena patungo sa konkretong pagkilos para sa katarungan.

“It challenges us to recognize the inherent rights of all God’s creation. Such rights provide us with the free will of conscience and discernment, enabling us to move beyond denouncing injustices toward acting for accountability and transparency in upholding dignity and equality for all people,” pahayag ni Bishop Alminaza.

Binanggit ni Bishop Alminaza ang patuloy na paglabag sa dignidad ng tao na nakikita sa kahirapan, gutom, kawalan ng trabaho, malnutrisyon, at lumalawak na agwat ng mayaman at mahirap—na higit na pinalalala ng extra-judicial killings, ilegal na pag-aresto, red-tagging, at pang-aabuso sa kapangyarihan.

Kinondena rin ng obispo ang malawakang korupsyon sa Department of Public Works and Highways (DPWH) na nagdulot ng substandard o hindi natapos na mga proyekto, na humantong sa pagkasira ng kabuhayan at pagkawala ng buhay.

“Corruption kills and violates human rights. Human Rights is indeed in our everyday life, and we demand accountability,” giit ni Bishop Alminaza.

Binigyang-diin ni Bishop Alminaza ang mga senyales ng pag-asa, kabilang ang lumalawak na pakikilahok ng mamamayan sa mga pagkilos para sa pananagutan, pagpapatupad ng human rights programs ng Caritas Philippines sa 30 diyosesis sa tulong ng European Union at Horizont300, at ang patuloy na pagkilala sa mga human rights defenders.

Tinukoy rin ng obispo ang mahahalagang hakbang sa bansa at mundo—tulad ng International Criminal Court (ICC) arrest warrant laban kay dating Pangulong Rodrigo Duterte; imbestigasyon ng Independent Commission for Infrastructure; utos ng Korte Suprema na ibalik ang P60 bilyon sa Philippine Health Insurance Corporation (PhilHealth) trust fund, at mga inisyatiba para sa mas mahigpit na pagbabantay ng proyekto at pagsusulong ng Anti-Dynasty Bill.

“We call for justice—to give to others what is rightfully due. We call for an end to impunity and for transparency and accountability. We call for collective action, which starts from respect for the dignity of every person and awareness that human rights is human dignity that calls for people in the Church to protect and promote justice for every person, every day,” saad ni Bishop Alminaza.

Tiniyak naman ni Bishop Alminaza na mananatiling matatag ang Caritas Philippines sa pagtatanggol sa mga naaapi at iginiit na tungkulin ng Simbahan at sambayanan na pangalagaan ang dignidad at karapatan ng bawat tao, lalo na ngayong Taon ng Hubileo ng Pag-asa.

Pagsasampa ng kaso laban sa Shell, suportado ng CBCP-ECSA-JP

Friday, December 12, 2025 8:06 am

 50,805 total views

Opisyal na nagpasa ng kaso noong December 11, 2025 sa United Kingdom ang 67 biktima ng Super Typhoon Odette mula Cebu at Bohol laban sa oil giant na Shell, isang makasaysayang hakbang na layong papanagutin ang kumpanya sa mga pinsalang dulot ng lumalalang krisis sa klima.

Ayon sa mga nagsampa ng kaso, may pananagutan ang Shell sa bigat ng pinsala ng Bagyong Odette noong 2021 dahil sa malaking ambag nito sa global carbon emissions at climate change.

Hiniling ng mga biktima ang financial compensation para sa mga nasawi, nasaktan, at nawalan ng tahanan, pati na rin ang paghihigpit sa operasyon ng korporasyon na patuloy na nagdudulot ng polusyon.

“This moment truly matters because it centers on the voices of communities who suffered immense loss yet have long been unheard,” ayon sa pahayag.

Kinilala naman ng Simbahang Katolika ang pagsasampa ng kaso bilang mahalagang hakbang sa moral at panlipunang pananagutan.

Binigyang-diin ni Bishop Gerardo Alminaza, chairman ng Catholic Bishops’ Conference of the Philippines – Episcopal Commission on Social Action, Justice and Peace (CBCP-ECSA-JP) at pangulo ng Caritas Philippines, na hindi maaaring manahimik ang Simbahan habang patuloy na naaapektuhan ang mahihirap ng krisis sa klima.

Ayon kay Bishop Alminaza, ang kaso ay paalala na ang desisyon at kapabayaan ng malalaking korporasyon ay may tunay na epekto sa buhay ng mga tao.

Kasabay ng pagdiriwang ng Taon ng Hubileo ng Pag-asa, nanawagan ang obispo sa pamahalaan, pampublikong sektor, at mamamayan na makiisa sa panawagan para sa climate accountability at kaligtasan ng mga komunidad, lalo na sa gitna ng mga desisyong nagbabalik sa mapanganib na fossil fuel dependence.

“Let us support efforts that seek truth, accountability, and healing. Climate justice is not against development. It ensures that development does not sacrifice lives, creation, and future generations,” ayon kay Bishop Alminaza.

Ang pananalasa ng Super Typhoon Odette, na may international name na Rai, noong 2021 ay nagdulot ng malawakang pinsala sa Visayas at Mindanao, kumitil ng daan-daang buhay, at puminsala sa libo-libong tahanan at kabuhayan.

Molbog tribe ng Palawan, humiling ng suporta sa simbahan at civil society groups

Thursday, December 11, 2025 9:19 am

 37,401 total views

Mariing kinondena ng Sambilog-Balik Bugsuk Movement ang patuloy na pananakot, pang-uusig, at banta ng sapilitang pagpapalayas sa 282 residente ng Sitio Marihangin, Barangay Bugsuk, Balabac, Palawan, kaugnay ng isinampang kaso na nakatakda sa pagdinig ngayong December 11, 2025 sa Brooke’s Point Regional Trial Court.

Sa pahayag, iginiit ng Molbog tribe na hindi nila kailanman iniwan ang Marihangin dahil dito ipinanganak, lumaki, at inilibing ang kanilang mga ninuno.

“Ito ang aming tahanan, aming kabuhayan, aming sambahan, at libingan ng aming mga ninuno. Ngunit sa loob ng maraming taon, paulit-ulit kaming hinaharass at tinatanggalan ng karapatan sa lupa at karagatang ninuno,” pahayag ng Sambilog.

Inilarawan ng mga katutubo ng Sitio Marihangin ang matagal nang panggigipit, kabilang ang paglusob ng mahigit isang daang armadong guwardiya sa nagdaang taon, na pinaniniwalaang mga tauhan ng San Miguel Corporation.

Binanggit din ng grupo ang magkakasunod na kaso laban sa 20 residente, kabilang ang grave coercion, direct assault, cyberlibel at illegal fishing, at hanggang ngayon, nakakulong pa rin sa Iwahig Penal Colony ang sitio leader na si Oscar “Tatay Ondo” Pelayo.

Giit ng grupo, mali ang pagtawag sa kanila bilang “squatter” at “informal settler,” lalo’t kinilala na noong 2011 ng Sandiganbayan ang paglabag sa kanilang karapatan nang pagmultahin ang dating alkalde ng Balabac dahil sa hindi paghingi ng Free, Prior and Informed Consent (FPIC) bago pahintulutan ang Jewelmer Corporation na magsagawa ng pearl farm operation sa karagatang ninuno.

Dagdag pa rito, nakabinbin pa rin mula 2005 ang kanilang aplikasyon para sa Certificate of Ancestral Domain Title (CADT) sa National Commission on Indigenous Peoples.

“Ang pinakabagong kaso ngayon ay isa lamang panibagong paraan para takutin at palayasin kami sa aming sariling tahanan,” ayon sa grupo.

Ayon sa Sambilog, konektado ang kaso sa planong 25,000 ektaryang luxury tourism project ng SMC, na mabilis nakakuha ng Environmental Compliance Certificate, Strategic Environment Plan Clearance, Certificate of Non-Overlap, at pagbaliktad ng Department of Agrarian Reform sa Notice of Coverage sa mga apektadong lupain.

Sa huli, nanawagan ang grupo sa mamamahayag, Simbahan, civil society groups at iba pang mamamayan na manindigan kasama ang 282 residente ng Marihangin upang ipagtanggol ang buhay, tahanan at dignidad ng buong komunidad.

“Hindi kami aalis. Hindi kami matatakot. Sa amin ang Marihangin,” giit ng grupo.

Pangunguna ng Pilipinas sa ocean pollution,nakakahiyang katotohanan-Cardinal David

Thursday, December 4, 2025 9:53 am

 56,460 total views

Itinuring na nakakahiyang katotohanan ni Kalookan Bishop Pablo Virgilio Cardinal David na ang Pilipinas ang nangungunang bansa sa buong mundo sa pagtatapon ng basura sa karagatan, isang krisis na dapat harapin at ayusin ng bawat mamamayan.

“The Philippines—our beloved archipelago of 7,641 islands—is ranked Number 1 in the world in contributing trash to the ocean. Not number one in reading, science, or mathematics. Not number one in good governance or environmental stewardship. But number one in polluting the very seas that give us life,” pahayag ni Cardinal David.

Ayon kay Cardinal David, higit dalawampung taon nang naipasa ang Republic Act 9003 o Ecological Solid Waste Management Act of 2003, subalit hindi ito ganap na naisakatuparan dahil sa kakulangan ng disiplina sa paghihiwalay ng basura at maling pamamalakad ng ilang lokal na pamahalaan.

Dagdag ng kardinal, ang mga sanitary landfill ay nagiging puno ng dumi at humahantong sa polusyon ng dagat, pagkalason ng isda, pagkasira ng kabuhayan ng mangingisda, at panganib sa seguridad ng pagkain.

“The sea that once fed our people is now choking with plastic washed down through our canals, creeks, and rivers by torrential rains into the ocean. We did this—to ourselves, to our neighbors, to our children,” giit ni Cardinal David.

Binigyang-diin ni Cardinal David na ang kalagayang ito ay kasalanan laban sa kalikasan, sa mahihirap na unang naaapektuhan at sa susunod na henerasyon.

Hinikayat ng kardinal ang publiko na magsimula sa sariling tahanan sa paghihiwalay ng basura, suportahan ang recycling at composting, at ipanawagan sa lokal na pamahalaan ang mas maayos na pamamahala ng basura.

“Start treating our country as the fragile, beautiful, irreplaceable archipelago that God entrusted to our care,” saad ni Cardinal David.

Batay sa 2023 Plastic Polluters study ng Utility Bidder, ang Pilipinas ang nangunguna sa pagtatapon ng plastic sa dagat, na umaabot sa tinatayang 3.30 kilograms kada tao bawat taon at higit 350,000 tonelada taun-taon.

Abot-kayang programang pangkalusugan, palalawakin ng CBCP-ECHC

Wednesday, December 3, 2025 4:06 pm

 43,409 total views

Nakikiisa ang Catholic Bishops’ Conference of the Philippines – Episcopal Commission on Health Care sa panawagang pangalagaan ang mental health ng mga pari.

Kasunod ito ng naging talakayan sa press conference na bahagi ng The Great Pilgrimage of Hope noong November 29, 2025 sa Penang, Malaysia.
Ayon sa CBCP-ECHC, patuloy na palalawakin ng komisyon ang mga programang pangkalusugan na abot-kaya at bukas para sa lahat, kabilang ang mga pari.
Kabilang dito ang community-based healthcare programs at pagtatatag ng ligtas na espasyo para sa medikal at psychosocial support, lalo na para sa mga paring dumaraan sa stress, anxiety, o burnout.

“The Episcopal Commission on Healthcare continue to develop programs that are accessible and available for everyone, including priests, establishing community base healthcare program and providing safe species species, where everyone is welcome in accommodated,” ayon sa CBCP-ECHC.

Sa press conference, ibinahagi nina Tokyo Archbishop Tarcisio Isao Cardinal Kikuchi at Penang Bishop Sebastian Cardinal Francis ang mga hamong kinakaharap ng mga klero sa Asya, lalo ang pag-iisa, kakulangan ng suporta, at matitinding batikos ng publiko, lalo na sa sensitibong usapin, na nagdudulot ng stress at burnout.

Sa mga nakakaranas ng mental health problem, maaaring tumawag sa National Center for Mental Health sa mga numerong 0917-899-USAP (8728); (02) 7-989-USAP; o 1553.

CBCP-ECIP, nagpahayag ng suporta sa bagong pinuno ng komisyon

Tuesday, December 2, 2025 3:58 pm

 45,762 total views

Nagpaabot ng pagbati ang Catholic Bishops’ Conference of the Philippines-Episcopal Commission on Indigenous Peoples (CBCP-ECIP) sa pagkakatalaga kay Calapan Bishop Moises Cuevas bilang bagong chairman ng komisyon.

Opisyal nang nagsimula ang tungkulin ni Bishop Cuevas noong December 1, 2025, bilang kahalili ni Bontoc-Lagawe Bishop Valentin Dimoc.

Nagpapasalamat naman ang CBCP-ECIP kay Bishop Dimoc sa limang taong paglilingkod bilang pinuno ng komisyon mula December 2020.

“Isang malugod na pagbati kay Lubos na Kagalang-galang Obispo Moises M. Cuevas, DD sa kanyang pagkakatalaga bilang ECIP Commission Chair at maalab na pasasalamat din kay Lubos na Kagalang-galang Obispo Valentin C. Dimoc, DD sa mga nagdaang taong paglilingkod bilang Commission Chair ng ECIP, “ ayon sa CBCP-ECIP.

Gayunman, mananatili pa rin si Bishop Dimoc bilang katuwang ng komisyon bilang vice-chairman.

Ang CBCP-ECIP ang sangay ng simbahan na nakatuon sa pangangalaga sa kapakanan ng mga katutubo, kabilang ang kanilang karapatan, lupaing ninuno, at pagpapanatili ng kultura at mga tradisyon.

Inaasahang sa ilalim ng pamumuno ni Bishop Cuevas ay magpapatuloy ang komisyon sa pagsusulong ng mga programa para sa mga katutubo, lalo na sa gitna ng iba’t ibang hamong kinakaharap sa kanilang mga lupaing ninuno.

Pagkakaisa kontra sa katiwalian, political dynasties panawagan sa publiko

Tuesday, December 2, 2025 3:00 pm

 45,140 total views

Nanawagan si Ramon Magsaysay 2025 Awardee at Program Paghilom Founder Fr. Flavie Villanueva, SVD, sa mga lider ng bansa at sa buong sambayanang Pilipino na magsasa-sama laban sa katiwalian at pag-iral ng political dynasties.

Ayon kay Fr. Villanueva, panahon na para wakasan ang korupsyon at panagutin ang lahat ng may kasalanan.

Ipinahayag ng pari ang panawagan kaugnay ng muling pagbubuklod ng mamamayan sa EDSA People Power Monument para sa ikalawang Trillion Peso March noong November 30, 2025, kasabay ng pagdiriwang ng Bonifacio Day.

“Panawagan sa mga kinaukulan, panawagan sa mga kababayan, panawagan sa lahat ng Pilipinong naghahangad ng mas magandang bukas–wakasan natin ang korupsyon, ikulong natin ang mga lahat ng may kasalanan, higit sa lahat, ibalik natin ang dangal ng pagiging tunay na Pilipino,” panawagan ni Fr. Villanueva sa panayam ng Radyo Veritas.

Binigyang-diin ni Fr. Villanueva ang kahalagahan ng pagmamalasakit at pagkalinga sa kapwa bilang mahalagang hakbang tungo sa tunay na kaunlaran ng lipunan.

Dagdag pa ng pari, hangga’t nagpapatuloy ang pang-aabuso sa kapangyarihan at paglabag sa sinumpaang tungkulin, patuloy ding magdurusa ang mamamayan, lalo na ang mga mahihirap.

“Walang pinagpalang bansa kung ang mahirap ay patuloy na pinababayaan,” ayon kay Fr. Villanueva.

Ayon sa tala ng Caritas Philippines, 86-arkidiyosesis at diyosesis mula sa iba’t ibang rehiyon sa bansa, kasama ang mga relihiyoso, lay organizations, at civic groups, ang nagpahayag ng suporta sa Trillion Peso March.

Batay naman sa ulat ng Philippine National Police, tinatayang 90,000 katao ang lumahok sa mga isinagawang kilos-protesta sa iba’t ibang panig ng bansa kasabay ng pagdiriwang ng Bonifacio Day.

Buhay ni St.Carlo Acutis, isang paanyaya sa lahat na huwag sayangin ang buhay

Monday, December 1, 2025 2:58 pm

 43,578 total views

Inihayag ni Msgr. Anthony Figueiredo, Director of International Affairs and Custodian of the Pericardium Relic of St. Carlo Acutis for the Diocese of Assisi, ang mensahe ng pag-asa at pananampalataya kaugnay sa pagbisita ng first class relic ng batang santo sa Pilipinas.

Ibinihagi ni Msgr. Figueiredo ang naging pagninilay ni Pope Leo XIV sa canonization ni St. Carlo Acutis, na ang buhay ng batang santo ay paanyaya lalo na sa kabataan na huwag sayangin ang buhay, kundi gawing makabuluhan sa pamamagitan ng pamumuhay na nakatuon kay Hesukristo.

Binigyang-diin ng monsignor na ang naging daan ni San Carlo tungo sa kabanalan ay ang palagiang paglapit at pagkapit kay Hesus, na itinuring niyang puso at sentro ng kanyang buhay.

“Saint Carlos Acutis is an invitation, not to waste life but to make of life a masterpiece,= and the secret is what Carlo teaches us. Carlo says always to be united to Jesus and that became the heart of his life,” pahayag ni Msgr. Figueiredo mula sa panayam ng Radyo Veritas.

Ipinaliwanag din ni Msgr. Figueredo na ang “Coure A Cuore” o “Heart to Heart”, tema ng pagdalaw ng pilgrim relics ni San Carlo, ay paanyaya sa mga mananampalataya na bumuo ng sariling “spiritual pericardium.”

Ayon sa monsignor, ang pericardium relic, ang lamad na bumabalot sa puso, ay sumasagisag sa kabanalan ng buhay ni San Carlo na nakaugat sa limang haligi ng pananampalatayang kanyang isinabuhay at itinuro—ang pagdalo sa Misa, pagpaparangal sa Kabanal-banalang Sakramento, pangungumpisal, debosyon sa Mahal na Birheng Maria at mga Santo, at pagkakawanggawa.

Iginiit din ni Msgr. Figueiredo ang paalala ni San Carlo na ang mundo ay nangangailangan ng mga banal dahil sila ang nagbibigay-pag-asa sa gitna ng kaguluhan, karahasan, digmaan, at iba’t ibang pagsubok tulad ng mga kalamidad at katiwaliang nararanasan sa Pilipinas.

“We need saints because saints change the world. They are a word of hope. And so often it seems we live in a hopeless world. So many problems, violence, wars, difficulties, even the Philippines, you’ve suffered from natural calamities, political corruption—and Carlo is a sign that goodness exists,” ayon kay Msgr. Figueiredo.

Sa pagbisita ng pericardium relic sa bansa, umaasa ang monsignor na mas marami pang Pilipino ang mahikayat na sundan ang landas ng kabanalan ni San Carlo, na tinaguriang millennial saint at saint of the digital age.

Dumating sa Pilipinas ang first class relic noong November 27 mula sa Diocese of Assisi, Italy, at nakatakdang libutin ang 19 arkidiyosesis at diyosesis sa Luzon hanggang December 15, 2025.

“This is what we bring in this pilgrimage. Miracles are possible through Saint Carlo Acutis. He’s working for us in heaven. Do not put limits on what Saint Carlo wants to do for us through Jesus in heaven,” saad ni Msgr. Figueiredo.

Kinalabasan ng COP30 summit, binatikos ng Living Laudato Si’ Philippines

Thursday, November 27, 2025 2:45 pm

 48,563 total views

Binatikos ng Living Laudato Si’ Philippines ang naging daloy at kinalabasan ng ginanap na 30th United Nations Climate Change Conference of Parties o COP30 Summit sa Belém, Brazil, matapos mabigong maihatid ang kinakailangang “paradigm shift” sa pagharap sa lumalalang krisis sa klima.

Ayon kay LLS Philippines Executive Director Rodne Galicha, malinaw ang pagkakalayo ng pananaw ng COP30 sa panawagan ni Pope Francis sa apostolic exhortation na Laudate Deum, na nagtatakda ng makatao, makatarungan at maka-Diyos na pananagutan ng pandaigdigang komunidad.

Iginiit ni Galicha na kulang sa agarang pagtugon at pananagutan ang naging tugon ng mga delegado, taliwas sa hinihinging solusyong epektibo, may obligasyon, at madaling masubaybayan, na dapat nakabatay sa moral na tungkulin ng bawat bansa.

“COP30 was an opportunity to bring the necessary paradigm shift, the change of focus, courage, and clarity towards the climate crisis. It did not deliver that paradigm shift. Pope Francis proposed three measures that are central to climate talks, and that have largely gone unimplemented: ‘drastic, intense and count on the commitment of all’,” pahayag ni Galicha.

Binigyang-diin ng LSS Philippines ang mahalagang papel ng faith-based at Catholic organizations sa pagpapaigting ng makatarungang climate action, lalo na sa pagsasabuhay ng katarungan at pagkakapantay-pantay alinsundo sa sa Laudate Deum.

Sinabi ni Galicha na ang COP30 ay parehong pagkakataon at hamon para sa 1.4 bilyong Katoliko sa buong mundo upang higitan ang simpleng paniniwala at isabuhay ang konkretong pagkilos batay sa makataong pananagutan.

“It is time for the Catholic community to take collective action for climate justice and advocate for the most vulnerable communities and ecosystems. Calls to accountability through genuine sustainable grassroots mobilization is needed, grounded in the responsibility and faith we share,” ayon kay Galicha.

Binanggit niya ang paalala ni Pope Leo XIV na hindi lamang dapat pangalagaan ang daigdig kundi maging masigasig na tagapagtaguyod ng katarungang pangklima, lalo na sa Global south at Amazon.

Kabilang din dito ang panawagan para sa tunay na pagkakaisa at aktibong pakikilahok bilang mamamayan, at hindi pagiging tahimik.

Pinaniniwalaan ni Galicha na dapat manguna ang Holy See bilang moral na tinig sa negosasyon, habang nananatiling hamon sa milyun-milyong Katoliko ang pagsasakatuparan ng konkretong pagkilos para sa climate justice.

“The Holy See must lead the way as one of the strongest moral voices in the negotiations and the challenge remains for the 1.4 billion Catholics to take action in the peripheries, demand climate justice and rally with the communities we serve and ecosystems we protect,” saad ni Galicha.

Pamumunong naghari-harian, pinuna ni Cardinal David

Wednesday, November 26, 2025 2:42 pm

 44,244 total views

Binigyang-diin ni Catholic Bishops’ Conference of the Philippines President, Kalookan Bishop Pablo Virgilio Cardinal David, na ang tunay na diwa ng Kapistahan ng Kristong Hari ay hindi pamumunong naghahari-harian, kundi pamumunong naglilingkod na dapat tularan sa lipunan at pamahalaan.

Sa kanyang mensahe sa Festival of Voices na isinagawa sa National Shrine of Mary, Queen of Peace o EDSA Shrine, bilang bahagi ng ika-100 taong pagdiriwang ng Kapistahan ng Kristong Hari, sinabi ng kardinal na ang pagiging Hari ni Kristo ay nakaugat sa pagpapastol at hindi sa kapangyarihan.

“Ito’y pagkalinga, hindi pananamantala sa maliliit. Ito’y pagpapagaling, hindi pananakit. Ito’y paghahanap sa mga naliligaw ng landas, hindi pagtataboy. Ito’y pagbubuklod, hindi pagkakahati-hati. Ito’y paglilingkod, hindi pangalipin,” pahayag ni Cardinal David.

Ayon kay Cardinal David, patuloy na sumisibol ang iba’t ibang anyo ng people power, patunay na buhay ang malasakit ng mamamayan; at sa gitna ng lumalalang katiwalian, ang mga tao mismo ang nagiging “antibodies” na nagpapalakas sa resistensya ng bansa laban sa korupsyon.

Iginiit ng kardinal, mahalaga ang pagbabayani­han upang maibangon muli ang mga demokratikong institusyong winasak ng kultura ng katiwalian, at hindi na rin sapat ang pananampalatayang nananatili lamang sa altar sapagkat ang simbahan ay lumalabas na ngayon sa kalsada.

Mariin ding tinuligsa ni Cardinal David ang mga lider na mapagsamantala at nagnanakaw sa kaban ng bayan na dapat sana’y para sa mga proyektong tunay na naglilingkod sa publiko,

Aniya, kailanman ay hindi dapat maging normal ang katiwalian at na ang transparency, public trust, responsableng pamumuno, at aktibong pakikilahok ng mamamayan ang susi upang mapanatiling buhay ang demokrasya at masugpo ang kasinungalingan.

Sinabi pa ng kardinal na walang sinuman ang likas na masamang tao kahit pa may nagawang pagkakamali, kaya’t hinimok niya ang mga opisyal at indibidwal na magpakatotoo, umamin, magsisi, at harapin ang pananagutan upang makamit ang pagkakasundo at kapayapaan ng bayan.

“Nananawagan ako sa natitirang kabutihan sa inyong kooban, magkusang loob na. Aminin ang dapat aminin. Pagsisihan ang dapat pagsisihan. Pagbayaran ang dapat pagbayaran, magkaroon tayo ng pagkakasundo at kapayapaan sa ating bayan,” saad ni Cardinal David.

Nakatakda naman sa November 30, 2025 ang ikalawang Trillion Peso March sa EDSA bilang pagpapatuloy ng panawagan para sa katapatan at kapayapaan, pangungunahan ng CBCP–Episcopal Commission on Social Action, Justice and Peace, at Caritas Philippines, katuwang ang iba’t ibang civil society groups.

Dalangin ni Cardinal David na manaig sa bansa ang pag-ibig, katotohanan, katarungan, liwanag, at ang paghahari ni Kristo sa puso ng bawat Pilipino.

Pagiging GMO free, panawagan ng Negros Bishops

Wednesday, November 26, 2025 2:32 am

 36,519 total views

Nanawagan ang mga obispo ng Negros Occidental na panatilihin ang 18-taong pagbabawal sa genetically modified organisms (GMOs) sa lalawigan upang mapangalagaan ang kalusugan, kalikasan, at kabuhayan ng mga magsasaka.

Sa pastoral statement na inilabas kasabay ng pagdiriwang ng Kapistahan ng Kristong Hari, hiniling nina Bacolod Bishop Patricio Buzon; Kabankalan Bishop Louie Galbines; at San Carlos Bishop Gerardo Alminaza sa pamahalaang panlalawigan na ipagpatuloy ang Provincial Ordinance No. 7 (2007), ang batas na nagpapanatili sa Negros bilang GMO-free.

Ayon sa mga obispo, mahalaga ang pagpapanatili sa GMO-free status upang mapangalagaan ang organic farming, biodiversity, at kalusugan ng mga Negrense.

“It is an ethical achievement, a landmark act of ecological justice, and a testimony to the wisdom of our people. To weaken or repeal it would not only be imprudent. It would be irresponsible, unjust, and dangerous,” pahayag ng Negros Occidental Bishops.

Tinukoy ng mga obispo ang mga pag-aaral na nag-uugnay sa GMO agriculture sa soil degradation, genetic contamination ng lokal na pananim, at mga posibleng panganib sa kalusugan.

Binigyang-diin ng mga pastol na ang pagpapatuloy ng pagbabawal sa GMOs ay nakaugnay sa layunin ng lalawigan na panatilihin ang titulong organic agriculture capital of the Philippines, lalo na ngayong ginaganap sa Negros Occidental ang Terra Madre Asia & Pacific 2025, isang pagtitipon tampok ang ecological food systems at farmer-led sustainability.

“To abandon this identity now–especially while hosting Terra Madre–is an embarrassment before the world and a betrayal of our people,” ayon sa mga obispo.

Hinikayat ng mga pastol ang lokal na pamahalaan, mga magsasaka, kabataan, at mga mananampalataya na pangalagaan ang organikong pamana ng Negros at patuloy na suportahan ang mga polisiya para sa ligtas at napapanatiling agrikultura.

Dagdag pa ng mga obispo na ang pagpapanatili ng GMO-free status ay proteksyon hindi lamang sa agrikultura, kundi pati sa kalusugan, karapatan sa pagkain, at kinabukasan ng mga susunod na henerasyon.

“As your pastors, we would be remiss in our responsibility if we fail to warn you. Its amendment or repeal is a serious violation of the right of the people to health, and a healthy environment… It is not only a policy issue. It is a moral issue. A life issue. A justice issue. A faith issue,” ayon sa Negros Occidental Bishops.

Paglapastangan sa digdinad ng tao, paglapastangan sa Diyos-Cardinal David

Monday, November 24, 2025 1:26 pm

 31,541 total views

Hinimok ni Catholic Bishops’ Conference of the Philippines President, Kalookan Bishop Pablo Virgilio Cardinal David ang mga mananampalataya na pagnilayan ang tunay na diwa ng Kapistahan ng Kristong Hari — ang paghahari ni Kristo na nagpapakita ng mataas na dignidad ng tao.

Ito ang pagninilay ng kardinal sa ika-100 taong pagdiriwang sa Kapistahan ng Paghahari ni Kristo Jesus sa National Shrine of Mary, Queen of Peace o EDSA Shrine noong November 23, 2025.

Ayon kay Cardinal David, isinugo si Kristo upang maghatid ng pag-asa, magpahayag ng Mabuting Balita, magpagaling ng may sakit, magpalaya sa naaapi, magpatawad sa nagkamali at magbigay-buhay sa sangkatauhan.

“Kung Kristiyano tayo, paninindigan natin na walang likas na masamang tao dito sa mundo. We distinguish always between person and action. The person is by nature good. Human beings are by nature good. But we are capable of evil action,” pagninilay ni Cardinal David.

Ipinaliwanag ng kardinal na ang anumang paglapastangan sa dignidad ng tao ay paglapastangan sa Diyos na nahahayag sa karahasan, walang saysay na pagpaslang, pang-aabuso sa kalikasan, at pagnanakaw sa kaban ng bayan.

Binigyang-diin ni Cardinal David na ang trono ni Kristo ay ang krus at ang karatulang “INRI,” na nangangahulugang “Si Hesus, ang Nazareno, Hari ng mga Hudyo,” na dating paratang ay naging tanda ng Kanyang tunay na paghahari.

Aniya, sa pagtingin sa Krus, naroon ang susi ng kaligtasan kung saan natatauhan ang tao, nagsisisi, humihingi ng tawad at nagbabalik-loob.

“Kahit masakit titigan, kailangan pala nating pagmasdan ang biktimang nakapako sa krus upang mamulat tayo sa walang hanggang pag-ibig ng Diyos na laging handang magbuwis ng buhay para sa ating katubusan. Upang tayo’y mamulat sa ating kahibangan. Upang tayo’y maantig at manangis, upang mahugasan ng luha ang ating mga mata, upang luminaw ang ating paningin at upang makita natin ang likas na dangal ng tao na patuloy na hinahamak,” ayon kay Cardinal David.

Nagbabala din si Cardinal David sa mapaminsalang epekto ng katiwalian na tinawag niyang makamandag at nakamamatay, at hinikayat ang mamamayan na pairalin ang katotohanan, kabutihan, at marangal na pamumuhay.

Panawagan ng kardinal ang pagbabalik-loob sa Panginoon upang manumbalik ang dangal ng bawat Pilipino at maghari ang katotohanan, katarungan at kapayapaan sa bansa.

“Kung tititigan natin Siyang mabuti, mahihimasan tayo. Kung hahayaan nating tumimo sa puso ang Kanyang dugo at sugat, magigising ang ating bayan. Kaya mga kapatid, pagmasdan natin ang hari sa krus. Pagmasdan upang matauhan, magsisi, magbalik loob at magpagaling,” saad ni Cardinal David.

Itinatag noong 1925 ni Pope Pius XI, sa pamamagitan ng ensiklikal na Quas Primas, ang pagdiriwang ng Christ the King upang tugunan ang paglaganap ng sekularismo at ipaalala ang paghahari ni Kristo sa buhay ng tao, sa lipunan at sa pamahalaan.

Scroll to Top