44,441 total reads
Ipinag-utos ng Mines and Geosciences Bureau (MGB) ang pansamantalang pagpapahinto sa operasyon ng Woggle Corporation kaugnay ng mga naganap na insidente sa Barangay Bitnong, Dupax del Norte.
Sa liham ni MGB Assistant Secretary for Mining Concerns at OIC Director Michael Cabalda kay Woggle Corporation President Tommy Alfonso noong February 5, 2026, ipinag-utos ang agarang suspension ng lahat ng exploration activities ng kumpanya dahil sa umiiral na “force majeure,” kabilang ang mga barikadang humarang sa pagpasok sa permit area.
Ayon sa MGB, mananatili ang suspension hanggang sa maibalik ang normal na peace and order situation batay sa kanilang pagsusuri.
“Woggle is hereby directed to immediately cease and desist from all exploration activities within the permit area for the duration of the suspension. This suspension shall not be construed as a cancellation of the Exploration Permit but is imposed strictly as a regulatory measure in view of existing force majeure situation,” ayon sa liham ni Cabalda.
Nilinaw rin ng ahensya na ang hakbang ay hindi nangangahulugang kanselado ang exploration permit, subalit inatasan ang Woggle na magsagawa ng rehabilitasyon sa mga naapektuhang lugar.
Pinuri naman ng Alyansa Tigil Mina (ATM) ang desisyon ng MGB at kinilala ang paninindigan ng mga residente ng Dupax del Norte na tumutol sa operasyon ng kumpanya sa pamamagitan ng mga kilos-protesta at barikada.
Ayon kay ATM National Coordinator Jaybee Garganera, hindi kikilos ang MGB kung hindi dahil sa matatag na pagtutol ng komunidad sa kabila ng banta at pananakot.
Gayunman, iginiit pa rin ng ATM ang panawagan na tuluyang kanselahin ang exploration permit ng Woggle dahil sa kawalan ng pahintulot ng komunidad at sapat na public consultations.
“The barricades and protest actions of the people clearly show their lack of consent to mining activities. This should compel the MGB to cancel the permit, which has been granted under dubious circumstances due to the absence of public consultations and other requirements,” giit ni Garganera.
Nanawagan din ang grupo sa administrasyon ni Pangulong Ferdinand Marcos Jr. na magpatupad ng mas mahigpit na regulasyon sa pagmimina, kabilang ang pagpapawalang-bisa sa Philippine Mining Act at pagpasa ng Alternative Minerals Management Bill.
