41,595 total reads
Nakibahagi ang social arm ng Diyosesis ng Virac, Catanduanes, sa ginanap na 42nd National Social Action General Assembly (NASAGA) 2026, na isang linggong pagtitipon na naglalayong patatagin ang ugnayan, pagninilay, at panibagong sigla sa panlipunang misyon ng Simbahan.
Ayon sa Caritas Virac, nagsilbing mahalagang espasyo ang NASAGA para sa mas malalim na talakayan hinggil sa gampanin ng Simbahan sa pagtugon sa mga hamon ng kasalukuyang lipunan, lalo sa usapin ng kahirapan, kawalan ng katarungan, at kalagayan ng mga nasa laylayan.
Dagdag ng institusyon, nagbukas din ang pagtitipon ng mas malinaw na landas para sa mas matibay na pagtutulungan ng Simbahan at pamahalaan, lalo na sa pagbabantay at pagsuporta sa mga programang tumutugon sa pangangailangan ng mahihirap at pinakabulnerableng sektor.
“The gathering provided a valuable space for learning best practices, building partnerships, and renewing our shared mission to serve those most in need. It was also a time for prayer, fellowship, and cultural exchange, strengthening the bonds among dioceses and inspiring everyone to return to their local Churches with renewed zeal,” ayon sa Caritas Virac.
Pinangunahan ng Diyosesis ng Imus, sa pamamagitan ng Caritas Imus, at katuwang ang Caritas Philippines—ang humanitarian, development, at advocacy arm ng Catholic Bishops’ Conference of the Philippines—ang NASAGA 2026 na dinaluhan ng humigit-kumulang 500 obispo, pari, relihiyoso, at social action workers mula sa iba’t ibang diyosesis sa buong bansa.
Isang mahalagang bahagi ng NASAGA 2026 ang pagdalo ng ilang miyembro ng gabinete, kabilang sina Education Secretary Sonny Angara, Social Welfare and Development Secretary Rex Gatchalian, Public Works and Highways Secretary Vince Dizon, at Second Congressional Commission on Education (EDCOM II) Executive Director Kiko Benitez Yee.
“Their engagement opened pathways for stronger collaboration between the Church and the government in service to communities, especially the poor, the marginalised, and the most vulnerable,” saad ng Caritas Virac.
Tema ng 42nd NASAGA 2026 ang “Sulong-Padayon: Pag-asa, Pananagutan, Pagbabago,” na ginanap mula February 2-5, 2026 sa Mother of Grace Convention Center sa Tagaytay City.
Unang isinagawa ang NASAGA noong 1969 bilang pagtitipon ng mga Social Action Center (SAC) directors at volunteers upang talakayin at pagtibayin ang mga mahahalagang resolusyon kaugnay ng mga programa, serbisyong panlipunan, at pagpapaunlad ng organisasyon ng National Secretariat for Social Action (NASSA), na kalauna’y naging Caritas Philippines.
