4,150 total reads
Nagbabala sa publiko ang Diocese of Cubao makaraang ma-hack ang Facebook account ni Bishop Honesto Ongtioco.
Sa impormasyong nakalap ng himpilan, ginamit ng hacker ang personal messenger account ng obispo upang humingi ng tulong pinansyal kung saan isa sa mga nakatanggap ng mensahe si Radio Veritas Station Manager Riza Mendoza.
Pinag-iingat ng diyosesis ang mamamayan at binalaang balewalain ang anumang mensaheng matatanggap mula sa account ni Bishop Ongtioco.
“Please refrain from responding to them if they are asking for any monetary assistance. You may message us here for verification.” pahayag ng Diocese of Cubao.
Bukod kay Bishop Ongtioco biktima rin ng hacking incident ang account ni Fr. Rey Paglinawan at Sr. Meriam Bauzon ang secretary ng obispo.
Samantala dahil sa sunod-sunod na hacking incident, hiniling ni Caritas Philippines President, Kidapawan Bishop Jose Colin Bagaforo sa senado ang malawakang imbestigasyon upang malutas ang suliranin at mapanagot sa batas ang mga sangkot sa hacking.
Magugunitang na-hack din ang personal account ni Bishop Bagaforo at ang official Facebook page ng Kidapawan kamakailan gayundin ang facebook page ng Diocese of Butuan.
Apela ng Catholic Bishops Conference of the Philippines sa mga Pilipino na ipagbigay alam sa kinauukulang tanggapan ng simbahan o mga diyosesis kung makatanggap ng kahina-hinalang mensahe mula sa social media accounts ng mga tanggapan at lingkod ng simbahan.
