3,623 total views
Pinangunahan ni Kalookan Bishop Pablo Virgilio David, ang pangulo ng Catholic Bishops’ Conference of the Philippines ang Mass of the Holy Spirit at Committment Proffession of Faith of Administrators and Students ng Pontificio Collegio Filippino.
Ikinagalak ni PCF Rector Fr. Gregory Ramon Gaston ang pakikiisa ni Bishop David sa paghahanda ng mga paring mag-aaral sa Roma gayundin sa muling pagtalaga ng mga nangasiwa sa institusyon sa pagsisimula ng panibagong school year.
“The PCF is an Episcopal Commission in itself under the CBCP, and we are blessed to have the CBCP President celebrate with us.” pahayag ni Fr. Gaston sa Radio Veritas.
Sa mensahe ni Bishop David, pinaalalahanan nito ang mga pari na unahin ang Panginoon sa bawat gawain lalo na sa kanilang adhikaing mas palawakin ang kaalaman na makatutulong sa pagtupad ng kanilang misyon bilang mga pastol ng simbahan.
“Seek the one thing that is necessary, to seek God’s Kingdom in all that we do.” ayon kay Bishop David.
Ilan sa mga kursong kinukuha ng mga pari sa mga unibersidad sa Roma na may specialization sa Ecclesiastical studies tulad ng Theology, Philosophy, Canon Law, Sacred Scripture, Communications at iba pa.
Itinatag ang PCF noong 1961 bilang ‘Home in Rome’ ng mga paring ipinapadala ng mga obispo mula sa iba’t ibang diyosesis sa Pilipinas para sa advance studies kung saan itinalaga ng CBCP si Antipolo Bishop Ruperto Santos bilang chairman ng komisyon ng PCF.
Pagbabahagi pa ni Fr. Gaston na tuwing weekend at bakasyon ay nagmimisyon ang mga Pilipinong pari sa mga Filipino communities sa Europa.
“They are deeply engaged in the ministry of scientific reflection on our faith.” dagdag pa ni Fr. Gaston.
Sa kasalukuyang datos may 50 Pilipinong pari ang naninirahan sa institusyon habang pito naman ang mga dayuhan.
Ilan sa mga paring nagtapos ng kanilang advance studies sa Roma ang naglilingkod sa iba’t ibang simbahan, mission territories sa buong mundo kabilang na sa Vatican City.
