694 total reads
Pinaalalahanan ni Military Ordinariate of the Philippines Bishop Oscar Jaime Florencio ang mga magulang na huwag ipagkatiwala sa iba ang pangunahing pananagutan sa paghubog sa kanilang mga anak.
Ito ang mensahe ng obispo sa kasal na kanyang pinangunahan para sa 17 magkaparehang mula sa Bureau of Jail Management and Penology–National Capital Region noong Agosto 27 sa Santuario de San Vicente de Paul Parish sa Quezon City.
Ayon kay Bishop Florencio, mahalagang pangalagaan at patatagin ang pamilya dahil ito ang pangunahing yunit ng lipunan. Aniya, ang pagkukulang sa loob ng tahanan ay may malawak na epekto sa pamayanan.
“Ang mga magulang ay may very sacred duty dahil sila ang first teachers. Sila ang humuhubog sa mga bata since the beginning,” pahayag ni Bishop Florencio sa Radyo Veritas.
Binigyang-diin ng obispo na ang unang natututuhan at nasasaksihan ng mga bata sa tahanan ay may pangmatagalang impluwensiya sa kanilang pagkatao.
“Huwag nilang ibigay sa ibang tao ang paghubog sa mga bata. What comes first will always be remembered,” ani Bishop Florencio.
Hinimok ng obispo ang mga magulang na ibalik ang values formation sa tahanan upang mahubog ang mabuting pagkatao ng mga anak at makatulong na maiwasan ang mga insidenteng kinasasangkutan ng kabataan, kabilang ang mga karahasang nagaganap sa mga paaralan.
Nanawagan din siya sa mga bagong kasal na pagtibayin ang kanilang pamilya at gabayan ang kanilang mga anak sa pananampalataya sa pamamagitan ng pagtuturo ng panalangin at paggalang sa Diyos.
“May mission tayo to build a family, a stronger family, at hubugin ang mga bata lalo na sa pananampalataya,” dagdag ng obispo.
Kasabay nito, tiniyak ni Bishop Florencio na bukas ang Simbahan sa mga pamilyang nangangailangan ng gabay sa gitna ng mga pagsubok.
“Huwag tayong mag-atubili na humingi ng tulong. Ang simbahan nandiyan lang palagi,” aniya.
Sa kanyang homiliya, hinimok din ng obispo ang mga bagong kasal, lalo na ang mga asawang babae, na tularan si Santa Monica na hindi nawalan ng pag-asa sa pagbabagong-loob ng kanyang asawa at ng kanyang anak na si San Agustin.
Paalala ni Bishop Florencio na bagama’t hindi perpekto ang tao, nananatili ang tulong at paggabay ng Diyos sa lahat ng lumalapit sa Kanya sapagkat Siya ay tapat sa Kanyang mga pangako.
Ang mass wedding ay inisyatibo ng Chaplain Service ng BJMP-NCR.
Pinuri ng obispo ang programa at sinabi niyang patuloy na isusulong ng Military Ordinariate of the Philippines ang pagtanggap ng mga sakramento, lalo na ang kasal, sa gitna ng pagbaba ng bilang ng mga nagpapakasal sa Simbahan sa bansa.
Ibinahagi rin ni Bishop Florencio na makatatanggap ng plenary indulgence ang mga bagong kasal na personnel ng BJMP at ang lahat ng dumalo sa pagdiriwang. Ipinagkaloob ito ng Vatican sa Military Ordinariate of the Philippines kaugnay ng paggunita nito sa ika-40 anibersaryo, alinsunod sa mga itinakdang alituntunin para sa pagtanggap nito.
