4,592 total views
Hinimok ng simbahan ang bawat mananampalataya na makiisa sa pananalangin para sa gaganaping Conclave o paghahalal ng bagong Santo Papa ng College of Cardinals na itinakda sa May 7.
Ayon kay Fr. Greg Gaston, rector ng Pontificio Collegio Filippino, ito ay bilang tugon na rin sa panawagang inilabas ng mga cardinal na inaasahang magtitipon sa conlave sa Sistine Chapel para maghalal ng bagong pinuno ng simbahan, kasunod ng pagpanaw ni Pope Francis noong April 21.
Paalala ni Fr. Gaston, ang pagpili ng bagong pinuno ng simbahan ay hindi isang political exercise kundi isang panahon ng taimtim na panalangin upang biyayayan ang simbahan ng isang lingkod na mamumuno sa buong kawan.
Iginiit pa ng pari na ang panalangin ay hindi lamang para sa mga cardinal kundi misyon ng buong mananampalatayang Kristiyano.
“Ito ang misyon natin ngayon, ipagdasal at araw-araw ang mga cardinal lalo na sa May 7, sa Wednesday pagpaasok nila sa conclave, ipagdasal natin ng mas malakas na kung sana ay maging faithful ang lahat sa pagpili ng bagong santo papa,” ayon sa pahayag ni Fr. Gaston sa Radyo Veritas.
Tagubilin din ng pari sa publiko na huwag maniwala sa mga lumalabas sa social media kaugnay sa mga cardinal na sinasabing mga kandidato, posibleng maging santo papa o papa bile.
Paliwanag pa niya, walang sinuman ang nakakaalam kung sino ang susunod na pinuno ng simbahan, habang pangunahin layunin naman ng mga media posting sa social media ay magparami ng shares/likes o para sa monetization.
Una na ring nilinaw ni Catholic Bishops Conference of the Philippines (CBCP) President Kalookan Bishop Pablo Virgilio David na ang paghahahal ng santo papa at hindi tulad ng halalan sa Pilipinas.
Sa halip aniya, ito ay isang taimtim na panalangin at pagninilay.
Ibinahagi rin ni Cardinal David sa kayang FB account ang isang panunumpang Latin na ginagamit ng mga Cardinal tuwing boboto sa pagpili ng Santo Papa — isang taimtim na panalangin na humihingi ng patnubay ng Diyos sa pagboto.
“Testor Christum Dominum, qui me iudicaturus est, me eligere in votum quod do illum, quem secundum Deum iudico eligi debere,” ito ay nangangahulugan sa English bilang ““I call as my witness Christ the Lord, who will be my judge, that my vote is given to the one who, before God, I think should be elected.”
Bukod sa gagawing conclave sa May 7, gaganapin naman sa Pilipinas ang Midterm and National election sa May 12, 2025.
Ayon kay Cardinal David, kung ang bawat Katolikong Pilipino ay magkakaroon ng parehong pananaw at paninindigan tuwing sila’y boboto, magdudulot ito ng mas makabuluhang pagbabago sa lipunan.
“Imagine if every Catholic Filipino voter can say the same oath before casting his/her vote in the coming elections?,” ayon pa kay Cardinal David.
Si Cardinal David ay kabilang sa tatlong Filipino cardinal na bahagi ng conclave kasama sina Manila Archbishop Jose Cardinal Advincula at Cardinal Luis Antonio Tagle- Prefect of the Congregation for the Evangelization of Peoples. Ito na ang pinakamaraming Filipinong cardinal na magiging bahagi ng paghahahal ng santo papa sa kasaysayan.
Ang tatlong cardinal ay kumakatawan hindi lamang sa bansa, kundi sa malakas na pananampalatayang Katoliko ng mga Pilipino sa buong mundo.
