274 total views
Hinihikayat ng punong pastol ng Diyosesis ng Baguio ang bawat isa na mag-alay ng panalangin para sa mga medical frontliners na ngayo’y lubos na nahihirapan sa sitwasyong dulot ng coronavirus pandemic.
Ayon kay Bishop Victor Bendico, dapat na bigyang-atensyon ng pamahalaan ang mga medical workers na magmula nang lumaganap ang COVID-19 sa bansa ay hindi na tumigil sa pagbibigay-lunas sa mga pasyenteng apektado ng virus.
Sinabi ng Obispo na hindi sapat at hindi makatarungan ang natatanggap na benepisyo ng mga empleyado ng ospital sa kabila ng kanilang pagsasakripisyo at panganib na maaaring makuha sa virus.
“Our health workers during this time of pandemic need gov’t attention and our prayers. They are tired and exhausted. Too much work, placed in too risky situations yet low pay,” bahagi ng pahayag ni Bishop Bendico sa Radio Veritas.
Dalangin naman ni Bishop Bendico ang lubos na kaligtasan ng mga medical frontliners laban sa banta ng virus upang mapaglingkuran nang maayos ang mga pasyenteng higit na nangangailangan ng atensyon.
Gayundin ang pagkakaroon ng katatagan at lakas ng loob na maligtas at maitaguyod ang kanilang mga pamilya sa gitna ng krisis dulot ng pandemya.
“I hope they still have the energy and determination to sacrifice their time, bodily health and strength to serve where service is needed… We pray for them to go on with their work. Their concerns are not only the care of their patients but also the protection of their family members,” saad ni Bishop Bendico.
Nakasaad sa Bayanihan Law na ang Special Risk Allowance ay ang benepisyong nagkakahalaga ng P5000 na matatanggap ng bawat medical frontliners kada buwan bilang insentibo ngayong panahon ng pandemya.
Kapag ito’y hindi natugunan ng pamahalaan, posibleng madagdagan pa ang bilang ng mga magbibitiw na healthcare workers na maaari ding magdudulot ng negatibong epekto sa sistemang pangkalusugan ng bansa.
Patuloy naman ang pakiusap ng Department of Health laban sa binabalak na ‘mass resignation’ at nangakong agad na tutugunan ang mga hinaing ng mga healthcare workers.