241 total views
Inaanyayahan ng Manila Cathedral ang mga mananampalataya na makiisa sa mga pagdiriwang ng Mahal na Araw ngayong 2026 sa pamamagitan ng iba’t ibang gawaing espiritwal at pagdiriwang ng banal na misa.
Ayon sa katedral magsisimula ang mga pagdiriwang sa March 29, Palm Sunday, kung saan magkakaroon ng mga banal na misa sa ganap na alas 8, at alas 10 ng umaga habang alas 4 at alas 6 naman sa hapon.
Pangungunahan ni Manila Archbishop Jose Cardinal Advincula ang Palm Sunday mass sa alas 10 ng umaga.
Sa April 2, Huwebes Santo, magsisimula ang pagdiriwang sa 6:30 ng umaga sa pamamagitan ng Morning Prayer na susundan ng Chrism Mass sa ganap na alas 7 ng umaga na pangungunahan din ni Cardinal Advincula.
Sa hapon ng parehong araw, ganap na alas 5 ng hapon ang Misa sa Takipsilim sa Paghahapunan ng Panginoon, na hudyat ng pagsisimula ng Paschal Triduum.
Samantala, sa April 3, Biyernes Santo, isasagawa ang mga tradisyunal na pagninilay sa pagpapakasakit ni Hesus kabilang ang Stations of the Cross sa ganap na alas 8:30 ng umaga, Siete Palabras sa tanghali, at ang Pagdiriwang ng Pagpapakasakit ng Panginoon sa alas 3 ng hapon na pangungunahan ni Cardinal Advincula.
Magpapatuloy ang pagdiriwang sa April 4, Sabado de Gloria, kung saan gaganapin ang Easter Vigil sa alas 8 ng gabi na pangungunahan ng arsobispo.
Sa April 5, Linggo ng Pagkabuhay, magkakaroon ng mga banal na misa sa alas 8 at alas 10 sa umaga, alas 4 ng hapon at alas 6 naman sa gabi bilang pagdiriwang ng muling pagkabuhay ni Hesukristo.
Bukod sa mga pagdiriwang ng misa, maglalaan din ang katedral ng mga oras para sa sakramento ng kumpisal mula March 30 hanggang April 3 upang mabigyan ng pagkakataon ang mga mananampalataya sa paghahandang espiritwal para sa mga Mahal na Araw.
Patuloy namang hinihikayat ng pamunuan ng Manila Cathedral ang mga mananampalataya na makiisa sa mga pagdiriwang ng Mahal na Araw bilang panahon ng panalangin, pagsisisi at mas malalim na pakikiisa sa pagpapakasakit, kamatayan at muling pagkabuhay ni Hesukristo.
