609 total reads
Nababahala si Pope Leo XIV sa patuloy na lumalalang sitwasyon ng karahasan sa Middle East at nanawagan ng panalangin para sa kapayapaan sa rehiyon.
Sa kanyang mensahe matapos ang pagdarasal ng Angelus sa Vatican, sinabi ng Santo Papa na patuloy na nakatatanggap ang mundo ng nakababahalang balita mula sa Iran at iba pang bahagi ng Middle East.
Binigyang-diin ni Pope Leo ang pangangailangang wakasan ang karahasan at bigyang-daan ang dayalogo upang matamo ang kapayapaan sa rehiyon.
“We lift up our humble prayer to the Lord, so that the thunderous sound of bombs may cease, weapons may fall silent, and a space for dialogue may open up in which the voice of the people can be heard,” ayon kay Pope Leo XIV.
Ipinagkatiwala rin ni Pope Leo sa Mahal na Birheng Maria, Reyna ng Kapayapaan, ang mga mamamayang patuloy na nagdurusa dahil sa digmaan upang gabayan ang puso ng mga tao tungo sa pagkakasundo at pag-asa.
Samantala, sa pagninilay ng Santo Papa sa Ebanghelyo ng pakikipagtagpo ni Hesus sa babaeng Samaritana, pinaalalahanan niya ang mga mananampalataya na si Hesus ang tugon sa pinakamalalim na pangangailangan ng tao.
Hinimok din ni Pope Leo XIV ang Simbahan na maging bukas sa mga pagkakataon ng biyaya ng Diyos at maging masigasig sa misyon ng ebanghelisasyon.
Binigyang-diin rin ng pinuno ng Simbahang Katolika na hindi panahon ang kasalukuyan para sa paghahati-hati sa loob ng pananampalataya.
“Lift up your eyes and recognize God’s surprises! This is not the time for opposition between one church and another, between ‘us’ and ‘them’,” ayon pa kay Pope Leo.
Kasabay nito, nakikiisa rin ang Santo Papa sa paggunita ng mundo sa International Women’s Day kung saan muli niyang iginiit ang kahalagahan ng pagkilala sa pantay na dignidad ng babae at lalaki.
Ayon kay Pope Leo patuloy na nararanasan ng maraming kababaihan ang diskriminasyon at iba’t ibang anyo ng karahasan mula pa sa kanilang kabataan kaya’t iniaalay niya ang kanyang pakikiisa at panalangin para sa kanilang hanay.
