12,092 total reads
Nanawagan ang Caceres Youth Commission sa mga kabataan partikular na sa lahat ng mga Parish Youth Ministries at Youth Organizations sa Arkidiyosesis ng Caceres na makibahagi sa pagsasagawa ng lokal na bersyon ng Trillion Peso March sa arkidiyosesis bilang pakikiisa ng mga Bicolano sa pambansang panawagan laban sa sistematikong korapsyon at para sa mabuting pamamahala sa bansa.
Matatandaang pansamantalang ipinagpaliban ang gawain na unang itinakda noong ika-25 ng Setyembre, 2025 bilang pag-iingat mula sa sama ng panahon na dulot ng Bagyong Opong sa Bicol region.
Nakatakda ang pagsasagawa ng lokal na bersyon ng pagkilos na tinaguriang ‘Trillion Peso March sa Kabikolan: Aldaw Nin Pamibi Ki Ina’ sa darating na a-uno ng Okture, 2025 sa Peñafrancia Basilica Minore Grounds sa Naga City.
“The Caceres Youth Commission calls on all Parish Youth Ministries and Youth Organizations to take a stand against corruption by joining the Trillion Peso March sa Kabikolan: Aldaw nin Pamibi ki Inâ tomorrow… Together with Inâ, let us stand as one Church and one nation. Rumpagon an Korapsyon sa Bilog na Nacion!” Bahagi ng paanyaya ng Caceres Youth Commission.
Magsisimula ang pagkilos sa pamamagitan ng isang Peaceful Protest March ganap na alas-dos ng hapon mula Ateneo de Naga University hanggang Peñafrancia Basilica Minore na susundan ng maikling programa ganap na alas-kwatro ng hapon upang ipahayag ang pakikiisa ang mga Bicolano sa panawagang papanagutin ang lahat ng may kaugnayan sa sistematikong katiwalian sa kaban ng bayan.
Inaanyayahan rin ang lahat ng makikibahagi sa pagkilos na magsuot ng puting damit bilang simbolo ng pagkakaisa at malinis na hangarin para sa katotohanan, katarungan at pagbabago sa bayan.
