13,024 total reads
Magpapatuloy ang impeachment trial laban kay Vice President Sara Duterte kahit hindi ito personal na humarap sa Senate impeachment court.
Ito ang inihayag ni House impeachment prosecutor at Manila Representative Joel Chua kasunod ng pormal na pagbubukas ng Senado bilang impeachment court.
Ayon kay Chua, nakasaad sa impeachment rules na pangunahing layunin ng writ of summons na makapagsumite ng sagot ang bise presidente sa Articles of Impeachment sa loob ng itinakdang sampung araw at makapagpasok ng plea sa korte.
Ipinaliwanag ng mambabatas na maaaring personal na humarap si Duterte, ipaubaya sa kanyang mga abogado ang pagharap sa korte, o piliing hindi dumalo bilang bahagi ng legal strategy ng depensa.
Paglilinaw pa ni Chua na kahit hindi humarap ang bise presidente o ang kanyang mga abogado ay magpapatuloy pa rin ang impeachment proceedings at awtomatikong maglalagay ng “not guilty plea” ang impeachment court para sa kanya.
“Now, in the event that the vice president did not appear in the impeachment trial or her lawyer did not appear or no answer was submitted, the trial will proceed anyway, and a plea of not guilty will be entered for the vice president,” paliwanag ni Chua sa isang panayam.
Kasunod nito, isasagawa ang pre-trial kung saan tatalakayin ang mga ebidensya, testigo, at mga usaping ihaharap sa aktuwal na paglilitis.
Naniniwala rin ang House prosecutor na mahalagang maipaliwanag ni Duterte ang mga alegasyon laban sa kanya na matagal nang inaantabayanan ng publiko.
Kabilang sa mga paratang laban sa pangalawang pangulo ang maling paggamit ng confidential funds, hindi tamang deklarasyon ng yaman, bribery, at pagbabanta laban kina Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez
