13,193 total reads
Hindi dapat awtomatikong matigil ang impeachment trial laban kay Vice President Sara Duterte sakaling magbitiw ito sa puwesto.
Ito ang pananaw ni House lead prosecutor at Batangas Representative Gerville Luistro kasunod ng mga usapin kaugnay ng posibilidad ng pagbibitiw ng bise presidente habang nagpapatuloy ang impeachment proceedings sa Senado.
“To answer your question, this is my opinion, not the opinion of the eleven prosecutors,” ayon kay Luistro.
Paliwanag ng mambabatas, “While resignation from office will render moot and academic the penalty of removal, it is my position that we need to continue the trial for the senator-judges to be able to determine whether or not they will impose as well the penalty of perpetual disqualification.”
Ayon kay Luistro, may dalawang pangunahing kaparusahan sa impeachment — ang pagtanggal sa puwesto at perpetual disqualification o habambuhay na pagbabawal na humawak muli ng anumang posisyon sa gobyerno.
Giit niya, kahit mawalan na ng saysay ang parusang removal kapag nagbitiw ang isang opisyal, dapat pa ring ipagpatuloy ang paglilitis upang matukoy kung dapat itong patawan ng disqualification sa paghawak ng public office.
Sang-ayon dito si Akbayan Representative Chel Diokno na nagsabing mahalagang legal na usapin ang posibilidad ng pagpapatuloy ng impeachment trial kahit magbitiw ang akusado.
Samantala, sinabi naman ni Mamamayang Liberal Party-list Representative Leila de Lima na pagkakataon din ng impeachment proceedings para mabigyan ng due process si Duterte at masagot nito ang mga alegasyon laban sa kanya.
Kasabay nito, inanunsyo rin ng House prosecution panel ang paghahati ng mga prosecutor sa apat na articles of impeachment laban sa bise presidente.
Kabilang sa mga paratang laban kay Duterte ang sinasabing maling paggamit ng mahigit P612 milyong confidential funds, hindi tamang pagdedeklara ng yaman at bank transactions sa kanyang Statement of Assets and Liabilities and Networth (SALN), bribery noong kalihim pa ito ng Department of Education, at grave threats laban kina Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez.
Tiniyak naman ng 11-member prosecution panel na handa silang iharap ang mga testigo at ebidensya sa Senado habang nagpapatuloy ang impeachment trial.
Ayon na rin sa panuntunan, kinakailangan ng two-thirds votes o 16 na boto ng senator judges upang ma-convict si VP Duterte sa pagkakasala, kabilang na ang hindi dumalo o absent na senador.
