14,174 total reads
Nagtipon ang mga makakalikasang grupo sa harap ng tanggapan ng Department of Environment and Natural Resources (DENR) upang manawagan ng pananagutan at katarungan kaugnay ng sunod-sunod na trahedya sa mga landfill sa bansa.
Pinangunahan ng Kalikasan People’s Network for the Environment (PNE) ang kilos-protesta matapos ang mga insidente ng pagguho ng Binaliw landfill sa Cebu noong Enero, landslide sa Rodriguez, Rizal noong Pebrero, at ang patuloy na sunog sa saradong landfill sa Navotas na nagdulot ng pagkasawi, pinsala, at panganib sa kalusugan ng mga komunidad.
Ayon kay Kalikasan PNE national coodinator Cathleen de Guzman, hindi aksidente ang mga trahedya kundi resulta ng kapabayaan at pagsasapribado ng pamamahala sa basura, kung saan inuuna ang kita kaysa kaligtasan ng mamamayan.
“The DENR fails to properly monitor landfills operations, continues to permit dumping beyond capacity, and maintains dilapidated facilities and equipment. This is bureaucrat capitalism, where government officials protect corporate profits instead of protecting people and the environment,” pahayag ni de Guzman.
Binanggit ng grupo na umabot sa hindi bababa sa 36 ang nasawi sa pagguho ng landfill sa Cebu, habang tinatayang mahigit 50 katao ang natabunan sa insidente sa Rizal batay sa ulat ng mga saksi—taliwas sa mas mababang bilang na inilabas ng mga kinauukulan.
Ipinunto rin ng Kalikasan PNE na naapektuhan ang kalidad ng hangin sa iba’t ibang lugar sa Metro Manila kasunod ng sunog sa Navotas landfill, kung saan naitala ang “very unhealthy” at “unhealthy” na antas ng polusyon sa ilang lungsod.
Bilang simbolo ng panawagan, naglatag ang mga makakalikasang grupo—kabilang ang Greenpeace Philippines at Samahan ng Magkakapitbahay sa Upper Smokey Mountain—ng isang mock air quality index meter na may mensaheng tumutuligsa sa kapabayaan ng administrasyon ni Pangulong Ferdinand Marcos, Jr. sa usapin ng kapaligiran.
Binigyang-diin ni Greenpeace Philippines Communications Campaigner Karl Orit, na hindi solusyon ang landfill at waste-to-energy facilities sa suliranin sa basura dahil nagdudulot lamang ito ng dagdag na panganib sa kalusugan at kapaligiran.
“This latest landfill catastrophe—the third so far this year—underscores how the government’s approach to waste is a total disaster. Waste disposal, whether in landfills or in burn facilities, does nothing to address the waste problem and, worse, poses serious risks to nearby communities,” giit ni Orit.
Kinondena rin ng mga grupo ang ilang pribadong kumpanya na sangkot sa operasyon ng mga landfill, kabilang ang International Solid Waste Integrated Management Specialist Inc. at Prime Integrated Waste Solutions, na iniuugnay sa mga insidenteng nagdulot ng pagkasawi at panganib sa mga manggagawa at residente.
Dahil dito, nanawagan ang Kalikasan PNE sa pamahalaan na papanagutin ang mga may sala, paigtingin ang mga regulasyon, at isulong ang mas ligtas at makakalikasang sistema ng pamamahala ng basura.
“It’s high time we need to reverse the privatization of the country’s waste management. As part of public service, the government must take full responsibility in ensuring safe, clean, and proper waste collection and disposal. But first, private corps responsible for the recent landfill disasters must be prosecuted and made accountable,” saad ni De Guzman.
Una nang binigyang-diin ni Cebu Archbishop Alberto Uy na ang pangangalaga sa kalikasan ay hindi lamang usaping panlipunan kundi isang pananagutang moral at espiritwal bilang paggalang sa sangnilikhang ipinagkatiwala ng Diyos sa sangkatauhan—hindi upang abusuhin, kundi alagaan at pagyabungin.
