58,550 total views
Inihayag ng Diocese of Tagbilaran ang planong pagtatayo ng kauna-unahang bamboo church sa lalawigan ng Bohol na isang proyektong nagtataguyod ng pananampalataya at pangangalaga sa kalikasan.
Ayon sa diyosesis, isinusulong ang proyekto bilang tugon sa lumalaking bilang ng mananampalataya ng St. Vincent Ferrer Chaplaincy sa Barangay Cabawan, Tagbilaran City, kung saan inaasahang makapagtitipon ang itatayong simbahan ng hanggang 1,500 katao.
Tampok sa disenyo ng simbahan ang paggamit ng treated bamboo na isang hakbang na binibigyang-diin ng diyosesis bilang pagpapahalaga sa kalikasan at konkretong pakikiisa ng Simbahan sa adbokasiya ng pangangalaga sa kapaligiran sa gitna ng patuloy na pag-unlad.
“More than a pursuit of distinction, the project seeks to let a local faith community speak to the world, showing how faith, sustainability, and innovation can rise together. What makes this project truly extraordinary is its vision to stand as a landmark bamboo church,” ayon sa pahayag ng diyosesis.
Bukod sa pagsagot sa pangangailangang pastoral, nagsisilbi rin ang proyekto bilang paghahanda ng pamayanan bago ang inaasahang pag-angat ng chaplaincy bilang ganap na parokya.
Ang inisyatiba ay pinangungunahan ng St. Vincent Ferrer Chaplaincy sa ilalim ng Diocese of Tagbilaran, idinisenyo ng arkitektong si Erven Digal, at sinusuportahan ng United Bohol Bamboo Advocates, Inc.
Plano ring itampok ang proyekto sa pandaigdigang entablado sa pamamagitan ng pagsusumite nito sa Guinness World Records bilang pinakamalaking bamboo structure ng uri nito.
“Plans are being prepared for submission to the Guinness World Records as the largest bamboo structure of its kind,” ayon sa diyosesis.
Itinakda ang pormal na paglulunsad ng proyekto sa January 4, 2026, na sisimulan sa pagdiriwang ng banal na misa sa mismong project site sa Barangay Cabawan.
Hinimok naman ng pamayanan ng Cabawan at ng buong diyosesis ang mga mananampalataya at mga institusyon na suportahan at makibahagi sa pagpapatupad ng proyekto.
Iginiit ng diyosesis na ang itinatayong bamboo church ay hindi lamang isang istruktura kundi isang sama-samang pangarap ng pamayanan na patunay na ang pananampalataya ay maaaring maging daan sa pagsusulong ng pangangalaga sa kalikasan at sa paglikha ng pamana para sa mga susunod na henerasyon.
