43,487 total reads
Hinimok ni Imus Bishop Reynaldo Evangelista ang mga parokya sa Diocese of Imus na gawing konkretong pagkilos ang pangangalaga sa kalikasan sa pamamagitan ng pagbabawas ng basura bago pa man ito malikha, partikular sa mga pista at malalaking pagdiriwang ng Simbahan.
Sa kanyang endorsement sa kampanya para sa Zero-Waste Church, binigyang-diin ni Bishop Evangelista na ang pangangalaga sa kalikasan ay hindi lamang isang programa ng diyosesis kundi isang pagbabago sa paraan ng pamumuhay ng mga mananampalataya.
“Indeed, ecological conversion is not simply a diocesan program but a transformation of our habits and values so that what seems waste for others becomes a source of new life through our responsible stewardship,” ayon kay Bishop Evangelista.
Apela ng diyosesis na magkaroon ang bawat parokya ng isang “Zero-Waste Celebration” ngayong 2026, na maaaring isang pista, malaking pagdiriwang, o pangunahing pagtitipon ng pamayanan.
Kabilang sa konkretong panawagan ang pag-iwas sa single-use plastic utensils sa mga salu-salo; sa halip ay gumamit ng mga nahuhugasan at maaaring gamitin muli.
Hinimok din ang mga parokya na iwasan ang pagpaparami ng mga tarpaulin at plastic banderitas, at sa halip ay gumamit ng isang reusable na fiesta announcement tarpaulin na maaaring baguhin at gamitin muli taun-taon, gayundin ng reusable cloth buntings.
Binigyang-diin ni Bishop Evangelista na magkakaugnay ang pangangalaga sa Sangnilikha at sa kapwa, lalo na sa mga mahihirap at sa susunod na henerasyon.
Ito rin ang direksiyong binigyang-diin sa kanyang pastoral letter sa pagdiriwang ng Season of Creation 2026, na nakatuon sa temang “Living Water.
Sinabi ng obispo na ang pangangalaga sa Sangnilikha ay bahagi ng bokasyon ng mga mananampalataya at dapat maisalin mula sa panalangin at pagsamba tungo sa konkretong pagkilos.
Binigyang-diin naman ng diyosesis na ang layunin ng zero-waste celebration ay hindi magdagdag ng panibagong tuntunin sa mga parokya, kundi magbigay ng sama-samang maliit na hakbang bilang pagpapahayag ng pagmamahal sa Sangnilikha.
“Christian celebration is not measured by how much we consume, but by how much life and communion we create,” anila.
