516 total reads
Ito ang paalala ni Tagbilaran Bishop Alberto Uy sa mananampalataya kasabay ng paggunita ng Araw ng mga Santo sa Unang Araw ng Nobyembre.
“Gipasidunggan nato karon ang mga Santos diha sa Simbahan ug sa atong pagpasidungog kita usab gipahinumduman nga matag usa nato gitawag ta nga mahimong balaan, mahimong santos dinhi sa Kalibutan. [Pinararangalan natin ngayon ang mga Santo ng Simbahang Katolika at kasabay nito tayo ay pinaalalahanan na bawat isa sa atin tinawag upang maging Banal dito sa sanlibutan.]” bahagi ng pagninilay ni Bishop Uy.
Ayon sa Obispo, ang pagiging Santo ay hindi nangangahulugan ng kawalang kasalanan sapagkat ang mga Santo ay may nagawang pagkakasala at pagkukulang habang sila ay nabubuhay subalit nagsusumikap na mamuhay na nakasusunod sa kautusan ng Panginoon.
Paliwanag ni Bishop Uy dapat maging huwaran ang mga Santo sa pagsusumikap na maging Banal kaya’t hindi nararapat mawalan ng pag-asa ang bawat isa na magpakabanal sa kabila ng mga pagkukulang.
Binigyang diin ng Obispo na sa kabila ng pagiging makasanlibutan ng tao binigyan ng Panginoon ang bawat isa nang kalakasan na makagagawa ng mabuti sa pamamagitan ng sakramento ng binyag.
“Diha sa Sakramento sa bunyag nga atong nadawat, nadawat usab nato ang grasya gikan sa Ginoo nga mao ang pagka-Santos o sanctifying grace. [Sa tinanggap nating Sakramento ng Binyag ay tinanggap din natin ang biyaya ng pagiging Banal o ang Sanctifying Grace.]” ayon pa sa Obispo.
Sa tala ng Simbahan mahigit sampung libo ang naitalagang Santo mula noong taong 993 kabilang ang dalawang Filipino na sina San Lorenzo Ruiz at San Pedro Calungsod na kapwa mga martir ng Simbahan dahil sa pagtatanggol sa pananampalatayang Katoliko.
