6,088 total views
Nanawagan si Military Bishop Oscar Jaime Florencio sa mga mananampalataya na ipanalangin ang mga Cardinal electors upang gabayan sila ng Espiritu Santo sa kanilang mahalagang misyon.
“Let us accompany our Cardinal electors with our fervent prayers as they enter the conclave. May the Holy Spirit guide them to rise above personal interests and focus instead on discerning who can faithfully carry the sweet yet heavy burden of leading the Church forward — in the spirit and vision of the late Pope Francis,” ayon sa ipinadalang mensahe ng obispo sa Radyo Veritas.
Binigyan diin ni Bishop Florencio ang kahalagahan ng gagampanan ng mga Cardinal sa kasalukuyang yugto ng Simbahan: “We hope and pray that the Holy Spirit will guide them to elect someone who will continue the pastoral and missionary zeal of Pope Francis.”
Si Pope Francis ay pumanaw noong Abril 21 sa edad na 88 matapos ang ilang buwang gamutan dahil sa komplikasyon sa baga.
Kilala ang yumaong Santo Papa sa kanyang malasakit sa mga maralita, mga migrante, at sa pagsusulong ng pagkakaisa sa Simbahang Katolika. Sa ilalim ng kanyang pamumuno, itinaguyod niya ang isang synodal Church—isang Simbahan na nakikinig, nakikipaglakbay, at bukas sa lahat.
Sa kasalukuyan, 124 Cardinal electors mula sa iba’t ibang bahagi ng mundo ang inaasahang boboto sa loob ng Sistine Chapel upang pumili ng susunod na Santo Papa. Ayon sa batas ng Simbahan, tanging ang mga Cardinal na wala pang 80 taong gulang ang maaaring bumoto sa conclave.
Ang misa para sa halalan ng Santo Papa (Pro Eligendo Papa) ay gaganapin sa St. Peter’s Basilica sa ika-7 ng Mayo, alas-10 ng umaga sa pangunguna ni Cardinal Giovanni Battista Re. Susundan ito ng opisyal na pagbubukas ng conclave sa hapon sa pamamagitan ng panalanging liturhiya at prusisyon patungong Sistine Chapel.
