4,836 total views
Magsasagawa ng lokal na bersyon ng Trillion Peso March ang Arkidiyosesis ng Caceres bilang pakikiisa ng mga Bicolano sa pambansang panawagan laban sa sistematikong korapsyon at para sa mabuting pamamahala sa bansa.
Inihayag sa Radyo Veritas ni Catholic Educational Association of the Philippines (CEAP) Vice President Rev. Fr. Wilmer Joseph Tria na siya ring head ng Caceres Archdiocesan Cluster for Education, ang pagsasagawa ng kilos-protesta na sagisag ng pakikiisa ng mga Bicolano sa tinig ng mamamayang Pilipino laban sa katiwalian sa kaban ng bayan at sa malawak na epekto na dulot ng kultura ng kawalan ng pananagutan o impunity sa bansa.
Ayon kay Fr. Tria, isasagawa ang National Day of Protest and Indignation Against Corruption sa September 25, 2025.
Sinabi ng Pari na magsisimula ang pagkilos sa pamamagitan ng isang Peaceful Protest March ganap na alas-dos ng hapon mula Ateneo de Naga University hanggang Peñafrancia Basilica Minore na susundan ng maikling programa ganap na alas-kwatro ng hapon upang ipahayag ang pakikiisa ng mga Bicolano sa panawagang papanagutin ang lahat ng may kaugnayan sa sistematikong katiwalian sa kaban ng bayan.
Pangungunahan ni Caceres Archbishop Rex Andrew Alarcon ang pagdiriwang ng banal na misa upang ipanalangin ang pagpapanibago ng mga gahaman sa salapi at kapangyarian na nagnanakaw sa pondo na dapat ay para sa bayan.
Inaanyayahan rin ang lahat ng makikibahagi sa pagkilos at magsuot ng puting damit bilang simbolo ng pagkakaisa at malinis na hangarin para sa katotohanan, katarungan at pagbabago sa bayan.
Batay sa tala ng CLCNT, umabot sa 70,000 ang bilang ng mga nakibahagi sa naganap na Trillion Peso March sa EDSA People Power Monument noong ika-21 ng Setyembre, 2025 bukod pa sa iba’t ibang mga pagkilos na isinagawa sa iba’t ibang diyosesis at arkidiyosesis sa buong bansa bilang pakikiisa sa National Day of Protest Against Corruption.
