4,534 total views
Pinaalala ng mga lider ng simbahang katolika sa Pilipinas na paigtingin ang pagkakaisa upang hindi humina ang boses ng mga Pilipinong sawang-sawa na sa nararanasang pasakit dulot ng katiwalian sa lipunan.
Ito ang mensahe nina Kalookan Bishop Pabilo Virgilio Cardinal David at Cubao Bishop Elias Ayuban Jr sa isinagawang Trillion Pesos March sa EDSA.
Ayon kay Cardinal David, sa pagkakaisa ng mga Pilipino ay lalong mapapalakas ang boses na labanan ang korapsyon kasama ang pakikiisa ng mga lider ng simbahan.
“Ito ay isang very strong statement sa ating pamahalaan na sawang-sawa na tayo sa katiwalian, palakasin naman natin ang ating demokrasya alang-alang sa kinabukasan ng ating mga kabataan. We deserve something better. Hindi totoong mahirap ang Pilipinas. Mayaman ang Pilipinas, pero mahirap ang mga Pilipino. Iyun ang isang malaking kabalintunaan na dapat matapos na. So ito po ay statement natin na we deserve a better government,” ayon sa panayam ng Radyo Veritas kay Cardinal David sa Trillion Peso March.
Positibo naman si Bishop Ayuban na ang pagkilos ay lalung nagpagising sa kamalayan ng mga Pilipino hinggil sa mga anomalya sa pamahalaan na bagamat madalas nangyayari ay nakakalimutan at napapalagpas lamang.
Ipinaalala ni Bishop Ayuban sa mga Pilipino ang ika-pitong utos ng panginoon na “Huwag kang Magnakaw” na binalewala ng mga tiwaling opisyal ng gobyerno.
Hinamon ng Obispo ang mamamayang Pilipino na iparinig sa buong sambayanan ang panawagan ng katarungan at pananagutan ng mga sangkot sa anumalya sa flood control projects.
