29,799 total views
Itinalaga ni Pangulong Fedinand Marcos Jr. si Department of Environment and Natural Resources (DENR) Secretary Raphael Lotilla bilang Philippine ambassador to the Holy See.
Ito ang inihayag ni Palace Press Officer Atty. Claire Castro sa ginanap na press briefing sa Malacanang.
“Secretary Raphael Lotilla, meanwhile, was designated by the President as Philippine ambassador to the Holy See,” ayon kay Usec. Castro.
Hahalili naman kay Lotilla si DENR Undersecretary Juan Miguel Cuna bilang acting secretary ng kagawaran.
Si Cuna ay unang naglingkod sa DENR bilang provincial environment and natural resources officer noong 2008, naging director mula 2010 hanggang 2015, at itinalagang assistant secretary at kalaunan ay undersecretary noong 2017.
Nagsilbi rin siyang law professor at dating opisyal ng Presidential Legislative Liaison Office.
Tiniyak ng Palasyo na maayos ang paglipat ng ng pamuanuan upang hindi maantala ang mga programa ng DENR, lalo na sa gitna ng mga isyung pangkalikasan at climate action.
Ayon pa kay Castro, si Lotilla ay hindi tinanggal sa puwesto ng pangulo kundi ay inilipat ng tungkulin.
“According to what we have heard, what Secretary Lotilla said was he preferred a lighter assignment. So that’s the information given to us,” ayon pa kay Castro.
Matatandaang si Lotilla ay unang nagsilbi bilang kalihim ng Department of Energy (DoE) bago italaga sa DENR noong 2025.
