616 total reads
Hinihikayat ng Catholic Bishops’ Conference of the Philippines – Episcopal Commission on Youth ang bawat botante lalu na ang mga kabataan at first time voters na masusing pag-aralan ang mga kandidato bilang paghahanda sa nakatakdang halalan sa bansa.
Ayon kay Diocese of Daet Bishop Rex Andrew Alarcon – chairman ng kumisyon, mahalagang pag-aralan ng bawat botante hindi lamang ang katauhan o karakter ng mga kandidato kundi maging ang plataporma at track record o mga nagawa ng mga ito.
Binigyang diin naman ng Obispo na bukod sa pagiging mapanuri ay mahalaga rin ang pananalangin at pagninilay ng bawat isa upang hilingin ang paggabay ng Panginoon sa paghalal ng mga karapat-dapat na mga opisyal ng bayan.
“Pag-aralan yung mga kandidato, ang kanilang plataporma, yung track record mahalaga rin ang kanilang track record kung ano ang kanilang nagawa nang sa ganun ay makapili tayo ng maayos, mahusay, so yung discernment mahalaga hindi lang pag-aaral kundi pagdarasal at this is very important so I encourage our young voters…” Ang bahagi ng pahayag ni Daet Bishop Rex Andrew Alarcon sa Radio Veritas.
Batay sa datos ng Commission on Elections (COMELEC) nasa mahigit 50-porsyento ng kabuuang bilang ng mga rehistradong botante na umaabot na sa mahigit 63-milyon ang kabilang sa itinuturing na ‘youth vote’ na mga botante na edad 18-taong gulang hanggang 40-taong gulang.
Samantala una nang ibinahagi ng COMELEC na umaabot na sa mahigit 4.3-milyon ang mga nagparehistro na mga first time voters na mas mataas sa target ng ahensya na 4-na milyon.
Kaugnay nito umaasa ang Simbahan hindi lamang sa matalino at aktibong pakikisangkot ng bawat mamamayan sa pangkabuuang proseso ng halalan kundi maging sa higit na paninindigan sa mga panlipunang turo ng Simbahan o pagpapairal ng One Godly Vote sa pagpili ng mga karapat-dapat na ihalal sa nakatakdang 2022 National ang Local Elections sa bansa.
