28,198 total reads
Makiisa ang Diocese of Malolos sa malawakang pagkilos laban sa lumalalang katiwalian sa bansa sa pamamagitan ng programang “Papanatag ang Sambayanan” na gaganapin sa Nobyembre 30.
Layunin nitong manawagan ng pagbabalik-loob, integridad, at pananagutan sa harap ng patuloy na sistemikong korapsyon sa pamahalaan.
“We join the call for accountability, good governance, and genuine concern for the Filipino people,” pahayag ng diyosesis.
Sa kanilang pastoral statement noong Setyembre 17, mariing kinondena ng diyosesis ang talamak na anomalya sa multibillion-peso flood control projects, kabilang ang mga programang nakaaapekto sa Bulacan na naging sentro ng imbestigasyon.
Giit ng diyosesis ang ganitong klaseng katiwalian ay isang matinding kawalang-katarungan na naglalagay sa panganib sa buhay at kabuhayan ng mga mamamayan.
“We strongly condemn fake and substandard infrastructure projects funded by public money yet left unbuilt or poorly executed,” anila, binigyang-diin na ang mga flood control ay hindi nakapoprotekta sa mga komunidad at sa halip ay nakapagpapalala ng pagbaha sa lalawigan.
Magsisimula ang pagtitipon sa Our Lady of Mount Carmel Parish Church (Barasoain Church) sa Malolos City sa ganap na ala-una ng hapon, na susundan ng prayer walk patungong Minor Basilica and Cathedral of the Immaculate Conception (Malolos Cathedral).
Dito isasagawa ang banal na misa sa ganap na alas-dos ng hapon sa pangunguna ni Bishop Dennis Villarojo na susundan ng isang maikling programa na magbibigay-daan sa pagbabahagi ng mga mensahe mula sa iba’t ibang sektor hinggil sa panawagan para sa pananagutan at mabuting pamamahala.
“Through this movement, we seek to transform protest into prayer and indignation into hope for national renewal,” ayon pa sa pahayag ng diyosesis.
Ang “Papanatag ang Sambayanan” ay pagpapakita rin ng pakikiisa ng diyosesis sa “Trillion Peso March,” ang malawakang kilos-protesta na inorganisa ng mga civic organizations katuwang ang Simbahang Katolika, na isasagawa sa EDSA People Power Monument sa Quezon City sa parehong araw.
