7,772 total reads
Ipinaliwanag ng isang pari at tanyag na Bicolano author ang nangyaring malawakang pagbaha sa Bicol Region sa kasagsagan ng pananalasa ng Bagyong Kristine.
Ayon kay Fr. Wilmer Tria, kura paroko ng St. Raphael the Archangel Parish sa Pili, Camarines Sur, ang pagbaha sa Bicol ay dahil sa kombinasyon ng heograpiya, klima, at mga pagbabago sa lupain.
Pagbabahagi ni Fr. Tria, ang Bicol ay napapaligiran ng mga bundok at bulkan na nagiging dahilan ng mabilis na pagdaloy ng tubig-ulan mula sa mataas na lugar patungo sa kapatagan.
“The West and the East coasts of Bikol are covered by mountains. Along Western coasts are the Ragay Hills, Bernacci and Taobtaob mountains while along the East are the chain of volcanos like Mt. Isarog, Mt. Iriga, Mt. Masaraga and Mt. Mayon,” ayon kay Fr. Tria.
Nagsisilbi namang tagakolekta ng tubig sa pamamagitan ng Bikol River ang Bikol Valley na nasa pagitan ng Albay at Camarines Sur mula sa magkabilang gilid ng rehiyon, at umaagos patungong San Miguel Bay.
Inihayag ni Fr. Tria na ang paglikha ng mga kanal para sa irigasyon at pag-aangkin o pagsakop ng mga komunidad sa mga pampang ng ilog ang nagdulot ng pagkitid at pagbabara sa likas na daluyan ng tubig.
Dahil dito, ayon sa pari, hindi nakakadaloy nang maayos ang tubig tuwing malakas ang ulan, kaya’t umaapaw ito sa mga kalapit na pamayanan.
“With heavy and prolonged rains, all waters from these Western and Eastern mountains rush to claim their space rights, gushing forth through constricted rivers and canals, bursting out through villages until they find their way out to San Miguel Bay. Then, the mouth itself is blocked with silt and solid waste,” saad ni Fr. Tria.
Batay sa ulat ng National Disaster Risk Reduction and Management Council (NDRRMC), tinatayang 71 lugar sa Bicol Region ang binaha kung saan labis na apektado ang lalawigan ng Camarines Sur.
Iginiit ni Fr. Tria na ang naranasang pagbaha sa rehiyon ay higit na pinalala ng pagkaubos ng likas na anyo at disenyo ng mga ilog at lawa.
Kaya naman iminungkahi ng pari ang pagpapanumbalik ng likas na daluyan ng tubig upang maibsan ang pagbaha, gayundin upang mas mapakinabangan ang tubig sa panahon ng tagtuyot.
“During dry season, we endure drought. During rainy days, we suffer from flood. This is the time to rethink our strategies to maximize these gifts from nature. We need to rediscover the purpose of rivers and lakes, recover their natural design and preserve and optimize them so that we have enough water during dry season and avoid inundation of villages during rainy days,” ayon kay Fr. Tria.
