9,219 total reads
Nagbabala ang isang nutrition expert na nananatiling hamon sa Pilipinas ang patuloy na pagtaas ng kaso ng malnutrition kasabay ng dumaraming bilang ng mga overweight at obese na Pilipino.
Sa panayam sa Barangay Simbayanan, sinabi ni Melvar Royeras, RND, Nutrition-Dietitian I ng Nutrition Foundation of the Philippines (NFP) na patuloy na nakararanas ang bansa ng mga kaso ng wasting o kakulangan sa timbang, stunting o pagkabansot, gayundin ng pagtaas ng overweight at obesity.
Ayon kay Royeras, isa sa mga hakbang ng pamahalaan upang matugunan ang problema ay ang pagpapatupad ng Philippine Nutrient Profile Model, na magsisilbing batayan sa paglalagay ng front-of-pack labels upang madaling matukoy ng mga mamimili kung mataas sa asukal, sodium, o saturated fat ang isang produkto.
Nilinaw rin ni Royeras ang isa sa mga karaniwang maling paniniwala ng mga Pilipino na kailangang alisin ang kanin sa pagkain upang pumayat.
“Ang kanin po ay hindi po natin kaaway. Kasi ito po ang source po natin ng energy. Ang mahalaga po ay yung dami ng pagkain, hindi po yung uri,” pahayag ni Royeras.
Hinikayat din niya ang publiko na sundin ang Pinggang Pinoy, kung saan kalahati ng plato ay dapat binubuo ng prutas at gulay, one-fourth ay isda o karne, at ang natitirang bahagi ay kanin o iba pang pinagkukunan ng carbohydrates.
Nagpaalala rin ang nutritionist na walang iisang diet na angkop sa lahat ng tao kaya’t mas mainam ang pangmatagalang pagsunod sa balanseng pagkain kaysa sa mga nauusong diet na nangangako ng mabilis na resulta.
“Ang diet po ay walang one size fits all. Ang pinopromote pa rin namin ay ang pagkakaroon ng sustainable practices at balanced diet kaysa sa mga diet na nagpa-promise ng mabilisang resulta,” dagdag ni Royeras.
Iminungkahi rin niya ang home gardening bilang praktikal na paraan upang magkaroon ng mas mura at mas sariwang gulay sa tahanan, habang nakatutulong din sa pagbawas ng food waste at pagsusulong ng mas malusog na pamumuhay.
Ipinagdiriwang ngayong Hulyo ang National Nutrition Month 2026 na may temang “Sa PPAN (Philippine Plan of Action for Nutrition): Sama-sama sa Nutrisyong Sapat para sa Lahat!” at may sub-theme na “Nutrisyon at Kalikasan, Ating Pangalagaan!”
