11,256 total reads
Pinaalalahanan ni Cebu Archbishop Alberto Uy ang mga mananampalataya na ang mga simbahan ay tanda ng pakikiisa at pakikilakbay ng Diyos kasama ang Kanyang bayan.
Ito ang naging mensahe ng arsobispo sa pagdiriwang ng Kapistahan ng Pagtatalaga sa Palasyong Simbahan ng Laterano (Feast of the Dedication of the Lateran Basilica) sa Roma noong Nobyembre 9.
Ayon kay Archbishop Uy, bawat bahay-dalanginan ay nagsisilbing kanlungan ng mga tao kung saan natatagpuan ang kapayapaan ng puso sa piling ng Panginoon.
“Whenever we enter a church, whether it’s a big cathedral or a small chapel, we are stepping into a space where heaven and earth meet, where God welcomes us home,” bahagi ng mensahe ni Archbishop Uy.
Binigyang-diin ng arsobispo na bagaman mahalagang panatilihing malinis at maayos ang mga simbahan, higit na dapat ding pagtuunan ng pansin ng bawat isa ang paglilinis ng puso mula sa galit, kayabangan, kasakiman, at inggit, sapagkat ang puso ng tao ang tunay na templong pinanahanan ng Diyos.
“Each one of us is God’s temple. Our hearts are where God wants to live. The Church is not just made of stone or cement, it is made of people filled with faith,” dagdag pa ng arsobispo.
Hinikayat din ni Archbishop Uy ang mga mananampalataya na maging simbahang buhay o isang sambayanang nananalangin, naglilinis, at nagbibigay-buhay lalo na sa mga nangangailangan.
“Let’s be a Church that prays, purifies, and gives life,” panawagan ng arsobispo.
Ipinagdiriwang taun-taon tuwing Nobyembre 9 ang Kapistahan ng Pagtatalaga ng Lateran Basilica, hindi lamang upang gunitain ang isang makasaysayang gusali, kundi upang ipahayag na ang bawat simbahan ay tanda ng buhay na presensiya ng Diyos sa Kanyang bayan.
Ang Lateran Basilica sa Roma ang pinakamatandang simbahan at ang katedral ng Santo Papa bilang Obispo ng Roma. Ito rin ay kinikilala bilang “Mother Church of all churches in the world.”
