23,365 total views
Hinimok ng pastol ng simbahan na tuluran si San Juan Bautista sa payak na pamumuhay at malalim na pananampalataya sa panginoon.
Ito ang paanyaya ni Manila Archbishop Jose Cardinal Advincula sa misang ini-alay sa Kapistahan ni St.John the Baptist sa San Juan City.
Inihayag ni Cardinal Advincula na mahalagang tularan ang pagsasabuhay ng santo sa katangiang pagtugon, pagpapakumbaba at pagiging tahimik na paglilingkod sa panginoon at pamayanan.
“Sa katahimikan, hinubog si Juan, doon siya naging matatag, doon siya naging handa kaya nga ang tunay na pag-asa ay hindi palaging maingay o dramatiko, minsan ito ay lumalago sa likod ng altar, sa loob ng pamilya, sa mga tahimik na sakripisyo ng mga ina, ama, manggagawa, estudyante, OFW at sa malalim na pananampalataya ng mga deboto ng ating Patron na si San Juan Bautista. Mga kapatid ganito tayo tinatawag ng Diyos, lumago tayo sa pananampalataya kahit walang gantimpala, maglingkod tayo kahit walang pumalakpak, gawin natin ang tama kahit walang nakatingin, ang tunay na pag-asa ay hindi laging malakas ang dating, madalas ito ay tahimik, ngunit totoo,”bahagi ng homiliya ni Cardinal Advincula.
Sinabi naman ni Father Mike Kalaw – Rector at Parish Priest ng dambana, ang pagdedebosyon kay San Juan Bautista ay pagbibigay pag-asa at inspirasyon sa kapwa at lipunan.
Ipinagdarasal ng Pari ang pagkakaroon ng mas malalim na pagdedebosyon sa Santo na ini-aalay ang sarili sa panginoon, paglilingkod sa kapwa at isinasabuhay ang payak na pamumuhay.
“Ang ating parokya, ang ating komunidad ay tinayo na bilang isang dambana noong nakaraang taon, ibig sabihin mas maraming misyon na kailangan tayong gampanan lalung-lalu na yung misyong pastoral tulad ng pag-aasikaso sa mga mahihirap, sa mga nagugutom, sa mga nangangailagan at ito’y akmang-akma sa buhay ng ating Mahal na Patron San Juan Bautista, sa patuloy na pagtatayo at pagdadagdag at pagsaayos nitong napakatanda ng simbahan, marami tayong mas matutulungan sa pamamagitan noong ating tinatawag na Development Structure,” ayon sa panayam ng Radyo Veritas kay Fr.Kalaw.
