9,467 total reads
Hinimok ni Bishop Ruperto Santos ang mga parokya at mananampalataya ng Diocese of Antipolo na aktibong makiisa sa pandaigdigang pagdarasal ng Santo Rosaryo para sa kapayapaan bilang tugon sa panawagan ni Pope Leo XIV.
Sa inilabas na circular letter ng obispo, binigyang-diin nito ang kahalagahan ng sama-samang pananalangin habang patuloy na nakararanas ng digmaan, karahasan, at pagdurusa ang iba’t ibang bahagi ng mundo.
“I earnestly encourage all parishes, shrines, religious houses, ecclesial communities, and the lay faithful of the Diocese of Antipolo to participate actively in this prayer initiative,” ayon kay Bishop Santos.
Isasagawa ang worldwide Rosary sa May 30, 2026, alas-siyete ng gabi sa Roma sa harap ng Lourdes Grotto sa Vatican City na pangungunahan ng Santo Papa at ilalathala sa iba’t ibang dambana at komunidad sa buong mundo.
Hiniling din ng obispo sa mga parokya na magsagawa ng communal recitation ng Santo Rosaryo ayon sa lokal na oras at palawakin ang partisipasyon ng mga mananampalataya sa pamamagitan ng parish announcements at digital platforms.
Naniniwala si Bishop Santos, na siya ring parish priest ng International Shrine of Our Lady of Peace and Good Voyage, na mahalaga ang sama-samang pananalangin para makamtan ang tunay na kapayapaan at pagkakaisa ng mundo.
“May this united prayer of the Church become a powerful plea for reconciliation, justice, and lasting peace throughout the world,” ayon sa obispo.
Layunin ng pandaigdigang pagdarasal na pag-isahin ang mga mananampalataya sa pananalangin para sa kapayapaan sa mga bansang apektado ng kaguluhan at armadong tunggalian sa pamamagitan ng Mahal na Birheng Maria.
