17,124 total views
Nanawagan ang mga lider ng Simbahan sa mga mananampalataya na manindigan sa katotohanan at isabuhay ang batas ng Diyos sa harap ng lumalaganap na kasinungalingan sa lipunan.
Sa pagdiriwang ng Kapistahan ng Sto. Cristo sa Sto. Cristo Parish sa Llano, Caloocan City, binigyang-diin ni Fr. Sunny Quejada, FLP, kura paroko ng parokya, na napapanahon ang paanyaya ng patron lalo na sa panahon ng fake news, misinformation at pagbaluktot ng kasaysayan.
“Mamuhay tayo ayon sa Gospel values… manindigan sa katotohanan para ang kasinungalingan ay hindi maghari,” pahayag ni Fr. Quejada sa panayam ng Radyo Veritas.
Ayon sa pari, hindi sapat ang panlabas na pagpapahayag ng pananampalataya kung hindi ito nakikita sa malinaw at matatag na paninindigan bilang mga binyagan.
“Bilang mga binyagan, tayo ay manindigan sa katotohanan. Ang iyong ‘oo’ ay maging oo, at ang ‘hindi’ ay hindi,” dagdag ng pari.
Hinimok din nito ang patuloy na panalangin at pagbabasa ng Banal na Kasulatan upang mahubog ang konsensiya at hindi matangay ng maling impormasyon.
Samantala, sa kanyang pagninilay, iginiit ni Novaliches Bishop Roberto Gaa na hindi binabago ni Kristo ang batas kundi pinalalalim ang pag-unawa rito.
“Hindi binabago ni Kristo ang batas; pinalalalim lamang ang pag-unawa rito. Hindi lang ito panlabas na pagsunod… kundi malalim na pagtalima na nagmumula sa pagsasapuso ng batas,” ayon sa obispo.
Ipinaliwanag ni Bishop Gaa na ang tunay na pagsunod ay hindi nakabatay sa takot sa parusa kundi sa panloob na pagbabago.
Ginamit pa nitong halimbawa ang pagsunod sa batas-trapiko upang ilarawan ang hamon ng integridad, ang paggawa ng tama kahit walang nakakikita.
Kinilala rin ng obispo ang kahinaan ng tao, ngunit hinikayat ang unti-unting pagbabago tungo sa kabutihan.
“Hindi porkit ginagawa ng nakararami, okay lang. Isipin lagi natin, ano ang Mabuti, at ano ang narararapat. Nagkakamali pa rin tayo… pero sana hindi pa ulit-ulit ang mali. Pakunti-kunti, patungo sa kabutihan” ani Bishop Gaa.
Ang Sto. Cristo Parish ay itinatag noong 2018 sa ilalim ng Diocese of Novaliches at kasalukuyang pinangangasiwaan ng mga misyonerong pari ng Franciscan of Our Lady of the Poor.
